"Araz-Naxçıvan" böyük futbola qayıtmağın planlarını cızır.

Bunun üçün lazımi işlər də görülür. Yeni mövsümdə 1-ci divizonda çıxış etmək üçün hazırlıq görən klub rəhbərliyi baş məşqçi postuna PRO kateqoriyalı Azər Bağırovu gətirib. Halbuki mütəxəssis bir müddət öncə “Səbail-2”də işə başlamışdı. Görəsən, onun divizionda çıxış edən komandanı atıb Region Liqasına yollanmasına nə səbəb olub? Bu və başqa suallar ətrafında Azər Bağırovla söhbətləşdik.

- Öncə “Araz-Naxçıvan”a təyinatınızın detallarını öyrənmək istərdik...

- Klubdan məsul şəxslər əlaqə saxladılar. Əlbəttə, bəzi məsələləri dəqiqləşdirdikdən sonra onlarla fikir mübadiləsi apardıq. Və mövzunun nə dərəcədə ciddi olduğu üzə çıxdı. Strategiya, iş planı və başqa məsələr ilə maraqlanandan sonra təklif mənə cəlbedici gəldi. Həmişə çətinliklərə sinəgərən, yeniliklərə hazır bir adam kimi fikirləşdim və “Araz-Naxçıvan”ın təklifini qəbul etdim. Bildiyiniz kimi, bu il Naxçıvan Futbol Federasiyasına yeni rəhbər təyin olunub. Bu şəxs Vüqar Abbasovdu. Onun köməkçisi isə Sakit Rzayevdi. Onlarla danışdıqdan sonra məsələnin nə dərəcədə ciddi olduğunu, iş planının uzun müddət üçün nəzərdə tutulduğunu anladım. İşinə peşəkar yanaşan bir rəhbərlə tanış olduğuma sevindim. Hər şeyin ən yaxşısını etmək üçün çalışmaq niyyətindəyik.

- Hazırda Naxçıvanda futbolun vəziyyəti necədi?

- 2013/14 mövsümündən etibarən Naxçıvanda böyük futbol, demək olar ki, geri gedirdi. Nə qədər daxili çempionat keçirilsə də, çıxış yox idi. Pandemiyanın bir neçə il davam etməsi də futbolu iflic vəziyyətə gətirdi. Uşaq futbolunun olmaması da gündəmdədi. Çox zəifdi. Lakin bacardıqca “Araz-Naxçıvan”ın uşaq futbolunun inkişafı üçün çalışacağıq. Vüqar Abbasovun dəstəyi ilə yaxın günlərdə çox şeyə nail olacağıq.

- Bir müddət öncə "Səbail-2"yə baş məşqçi təyin edilmişdiz. Divizion komandasını atıb Region Liqasında çıxış edən kluba getməyinizə nə səbəb oldu? "Səbail"də problem yaşadız?

- “Səbail-2”də ilk gündən həm klub, həm məşqçilər, həm də futbolçular tərəfindən çox yaxşı qarşılandım. Bəziləri məni tanıyırdı. Sağ olsunlar, klub rəhbərliyi ilə ilk görüşümüzdə onların mənim üçün təlim-məşq toplanışı təşkil etmələrini istədim. Heç bir problem olmadığını söylədilər. Bir neçə detal vardı ki, onları dedim. İki gün keçməmiş bütün dediklərimi təşkil etdilər. Belə deyim, “Səbail-2”dəki günləri ən xoş hisslərlə xatırlaya bilərəm. Bu da mənim üçün bir sınaq idi. Kluba da bundan sonrakı işlərində uğurlar arzulayıram. Region Liqasında çıxış edən kluba getmək mənim üçün maraqlı gəldi. Çətinliklərdən qorxmayan biri kimi bu işi boynuma götürdüm. Rəhbər şəxslərin sözünə inanaraq, hər şeyin uzunmüddətli olacağını və mənə dəstək göstərəcəklərini bilərək təklifi qəbul etdim. Hər məşqçi öz prezidentini tapmalıdı. İnşallah, “Araz-Naxçıvan”da uğurlu olacağıq.

- “Araz-Naxçıvan”ın hədəfləri nədi?

- Region Liqasında yarımfinal mərhələsi üçün Bakıya gələcəyik. Burda yaxşı nəticələr əldə edib birinci diviziona vəsiqə qazanmaq əsas hədəfimizdi.

- Hazırda Region Liqasında vəziyyət necədi?

- Birinci pillədəyik. İki turdan sonra ciddi rəqibləqarşılaşacağıq. Qələbə qazanıb final mərhələsinə adlayacağıq.

- Təyinatınızdan bir neçə gün əvvəl Tanju Çolakın Naxçıvana səfəri baş tutdu. Klubda onunla bağlı ciddi layihə olduğu mediada yazılır. Bu haqda nə deyə bilərsiz?

- Bu, klub rəhbərliyinə aid olan məsələdi. Kimə nə təyinat veriləcəyi haqda dəqiq məlumatım yoxdu.

- Köməkçiləriniz bəllidi, yoxsa hələ düşünürsüz?

- Köməkçilərim hazırda “Araz-Naxçıvan”da çalışan məşqçilərdi. Yolumuza davam edəcəyik. Gələcəkdə necə olacağını bilmirik. Zamanla hər şey yerini tapacaq.

SƏNƏM FƏRHADOVA