Yığma Maltada keçirdiyi ikinci yoxlama oyununda da məğlub oldu. Bu dəfə Latviya önündə üzümüz qızartdı.

Canni de Byazinin komandası bununla FIFA reytinqində qabaqladığımız növbəti rəqiblə bacarmadı. Görüş haqda fikirlərini səsləndirməsi üçün Zaur Ramazanovla əlaqə saxladıq. Onunla millinin oyunları, qardaşına 1 dəqiqə belə şans verilməməsi, komandanın ümümi problemləri haqda söhbətləşdik.

- Milli Maltada keçirilən görüşlərdə yerli komandaya və Latviyaya uduzdu. Bu haqda fikirlərini bilmək maraqlı olardı.
- Biabırçılıqdı! Mən həmişə demişəm, Canni de Byazi məşqçi deyil! Onu bura gətiriblər, ildən-ilə müqaviləsini uzadırlar. Onun rəhbərliyi dönəmində də irəli getməkdənsə, geriləyirik. Danışıram deyə Ağabalanı yığmaya çağırdılar. Guya bundan sonra nəsə deməyəcəm. Amma mən yenə də doğru bildiklərimi danışacam. Milli bərbard durumdadı. Görün kimlərə uduzuruq? Balaca dövlətlərlə bacarmırıq. Halbuki onlara 4-5 qol vurmalıyıq. Heyətdə gül kimi uşaqlar var. Amma De Byazi onlardan istifadə edə bilmir. Milli komanda zəif deyil, sistem, iş düzgün qurulmayıb.

- Qardaşınız Ağabala ilk oyunda, ümumiyyətlə, “23-lüy”ə düşmədi. Latviya ilə matçda da isinmə hərəkətləri etsə də, meydana buraxılmadı. Mehdi Cənnətova, Nicat Mehbalıyevə və Ağabalaya şans verilmədi. Bunun səbəbi nədi?
- Elə bu davranışından görünür ki, De Byazi məşqçi deyil. Oyunçunu sınamayacaqsansa, onu niyə yoldaşlıq görüşləri üçün heyətə çağırmısan? İndi deyəcək ki, dəvət etdim, amma məşqlərdə özünü göstərə bilmədi. Bu cür bəhanələr gətirəcək. Hamısı boş şeydi. Mediada rahat danışdığıma görə mənimlə prinsip aparırlar. Ağabalanı yaxşı vaxtlarında dəvət etmədilər. İndi neçə oyundu düz-əməlli oynamır, həm də zədəlidi, lakin çağırdılar. Mən belə şeyləri başa düşə bilmirəm. Axı bu nəyə lazımdı? Çağırmasaydız, daha hörmətli olardı.

- Sizlə nəyin prinsipini aparırlar? Problem təkcə açıqlama və müsahibə verməyinizdədi?
- Bu gün bir çox veteran danışmır. Biri deyir ki, məşqçiyəm, digəri cərimədən qorxur. Onlar başa düşmürlər ki, həyatda həmişə qorxaq kimi yaşayacaqlar. Çünki düzgünlük ən gözəl şeydi. Həqiqət olmayan yerdə nə uğur olar, nə də qələbə. Mən necə danışa bilirəm? “Səbail”də işləyəndə yalandan hər şeyə “yaxşıdı” deyə bilərdim. Guya mən danışmasam, insanlar olanları görmür? Hər şey göz qabağındadı. Bunlar üçün düzünü deyənin yeri yoxdu. Belə şeylər etdiklərinə görə də Allah cəzalarını verir.

- Bu nəticələrdən sonra hansı dəyişikliklər olmalıdı?
- Hər şey dəyişməlidi. 15 ildə biz nə əldə etmişik? Şimali Makedoniyanın normal stadionu yoxdu. Amma İtaliyanı məğlub etdilər. İllər öncə biz onlarla başabaş mübarizə aparırdıq. İndi bizdən güclüdülər. Çünki sistemli iş görürlər. İşi bilənləri önə çəkdilər. Davamlı uduzsalar da, sistemləri düz idi və nəticə verdi. Bizdə isə 2-3 veteranı tapıblar, onlar da ancaq AFFA-nı tərifləməklə özlərinə gün ağlayırlar. Amma sabah problemlər onların da başında çatlayacaq.

- Bir çoxları deyir ki, futbol azərbaycanlıların bacardığı iş deyil. Bəlkə həqiqətən də belədi?
- Bəs necə olur ki, Qurban Qurbanov bacarır? Niyə onun komandası illərdi avrokubokların qrupunda mübarizə aparır? “Qarabağ”ın heyətinin yarıdan çoxu azərbaycanlıdı. Onlar necə bacarır futbol oynamağı?

- “Qarabağ”ın futbolçularının klubdakı oyunu yığmada sərgiləmədyini söyləyənlər də var. Bu fikirlərlə razısız?
- Boş söhbətdi. Kim yığmada yerini bərkitmək istəməz? Dəvət alanların hamısı can-başla mübarizə aparır. Sadəcə, iş düzgün olmayanda hər yerdə uduzursan. Gərək düz adamlar millidə işləsin ki, hər şey qaydasında olsun.

- Ölkəni futbolunu düzəltmək üçün AFFA-da kimlər çalışmalıdı?
- Bir adama 5-6 il möhlət verərlər ki, nəsə iş görsün. Alımayanda da ona yenidən güvənərlər. Amma 15 il keçib. Elə dirəşiblər ki, ingilis dilini bilməlisən. Futbolu bu dildə oynayırlar? Guya bütün federasiyalarda ancaq ingilis dilini bilənlər çalışır? Gəncləri irəli çəkmək lazımdı. Bütün yığmalarda yerli məşqçilər olmalıdı. Neçə ildi o gedir, bu gəlir. Bizimkinə növbə çatanda heç 7 ay dözmürlər. Sonra da deyirlər ki, bacarmadı və yola salırlar. Mənə maraqlıdı ki, yuxarılar niyə bunları görmür? Bu nəticələr biabırçılıqdı. Camaat içinə çıxa bilmirik. Harasa gedəndə başlayırlar ki, bizdə futbol yoxdu.

- Sizin üçün daha çətindi, qardaşınız da millinin düşərgəsində olub...
- Əlbəttə! Heç qardaşım olmasın komandada. Milli hamımızındı. Biz Azərbaycan bayrağının altında böyüyürük. Söhbət təkcə qardaşımdan getmir. Mən neçə il futbol üçün əziyyət çəkmişəm. Nə üçün kiminsə prinsipinə görə kənarda qalmalıyam? Azərbaycan çempionu, iki dəfə bombardir olmuşam. Onda məni ingilis dili bilənlər başa salıb? Üç dəfə Azərbaycan kubokunun, “Birlik kuboku”nun qalibi olmuşam. Bu turnirdə ən yaxşı futbolçu seçilmişəm. Başqa nə lazımdı ki, işləyə bilim? Mənim oyunumu Platini, Blatter bəyənib. Necə yəni Azərbaycanda futbol yoxdu?

İLKİN SULTANLI