Millinin Malta toplanışı çərçivəsində keçirdiyi hər iki oyunda uduzması istər ictimaiyyət arasında, istərsə idman mediasında və sosial şəbəkələrdə çox müzakirə olunur.

Futbol ictimaiyyəti arasında tanınan bəzi şəxslər Malta və Latviyaya yenilgiyə görə baş məşqçi Canni de Byazini qınayır, bəziləri günahı futbolçularda görürsə, AFFA rəhbərliyini tənqid atəşinə tutanların da sayı az deyil. Paylaşılan fikirlər arasında diqqəti çəkənləri təqdim edirik.

Araz Əhmədov (sportfm.az saytının baş redaktoru): “Növbəti görüşündə 10 nəfər qalan millimiz şücaətlə vuruşaraq, Latviyaya qəhrəmanacasına minimal hesabla məğlub oldu. Komandamız latışların tarixində üzərimizdə ilk qələbəsini rəsmiləşdirərək böyük uğura imza atdı. Əhsən”.

Səbuhi Səfiyarlı (futbol agenti): “De Byazi deyib ki, 3 ötürmə verə bilmiriksə, burda hücum futbolundan söhbət gedə bilməz. Adama deyərlər ki, bu komandanı götürmədən oyunlarına baxmamışdın? Və görməmişdin ki, 3 ötürmə verə bilmirlər? Görmüşdünsə, onda niyə razı olmuşdun işləməyə? Yox, sən baxanda 3 ötürmə verə bilirdilər, amma indi verə bilmirlərsə, yenə də səbəbini səndən soruşmaq lazımdı. Günahı futbolçuların üstünə atmağa nə var ki... Makedoniyanın oyunçuları Almaniya, İtaliya, Portuqaliya yığmasının futbolçularından zəifdi. Amma görülən iş sayəsində komanda olaraq onlarla az qala bərabər səviyədə oynayırlar! Hardan başlayasan, kimdən başlayasan, hansını deyəsən?! Belə dərd olar, a kişi? Bu xarabada bir komandanı təsadüfən də olsa, udmaq olmaz? Xarab saat da gündə bir dəfə düz vaxtı göstərir. “Neujeli” bir dəfə "səhvən" yaxşı məşqçi gətirmək olmur? Yoxsa məşqçidən tələblər başqadı?”

Anar Xanlarov (rekord.az saytının əməkdaşı): “Sözüm AFFA rəhbərliyinədi: yəni altı hərfdən ibarət bir sözü yerinə yetirmək bu qədər çətindi? Yığışırsız, bütün Azərbaycan xalqından, futbol ictimaiyyətindən üzr istəyirsiz və etiraf edirsiz ki, 14 il işlədik, çalışdıq, amma bacarmadıq. İstefa verib gedirsiz. Bəlkə sizdən sonra gələnlər nəsə edə bildi? Ən azı Azərbaycan futbolunun xilası naminə bunu etmək olar axı. Yəni sizin içinizdə heç olmasa, 0,5 faiz də vətən sevgisi yoxdu? Bu gün dünya reytinqində 135-ci, 174-cü pillədə olan komandalara belə məğlub olursuzsa, daha nəyə ümid edib oturmusuz? Yəni dərk etmirsiz ki, bu ölkənin, bu millinin problemi futbolçu, baş məşqçi yox, ilk növbədə futbol idarəçiliyidi. Çıxın gedin artıq, nə qədər ki, biabırçı şəkildə qovulmamısız, hələ də şansınız qalır”.

Rəşad Elgün (komanda.az saytının baş redaktoru): “Orta statistik azərbaycanlı futbolçu hansı xidmətlərinə görə alın təri ilə ali təhsil haqda diplom əldə edən və rüşvət almadan vicdanla müəllim adını daşıyan bir vətəndaşımızdan 10 dəfə artıq məvacib almalıdı? Həftədə bir dəfə 90 dəqiqə ərzində şıllaq atacaq, Allah eləməmiş, milliyə dəvət aldıqdan sonra isə klub prezidentinə “maaşımı qaldırmalısan” deyənlərlə biz Şimali Makedoniya olmaq istəyirik?"

İbrahim Cəfərov (futbolxəbər.az saytının baş redaktoru): “Sonra məni qınayırlar ki, Qara Qarayevi haqsız yerə tənqid edirsən”.
İlkin Fikrətoğlu (ATV-nin əməkdaşı): “Yığma komandaya o qədər əcnəbi məşqçi, əcnəbi futbolçu gətirmək yerinə AFFA-nın rəhbərliyinə əcnəbi funksioner gətirsəz, əla olar. 30 illik hədiyyəni, elə fəaliyyətinizə qiyməti də ötən gecə Malta futbolçuları verdi”.
Daşın Əziz (offsideplus.az saytının əməkdaşı): “Azərbaycan millisi reytinq cədvəlində daha iki pillə geriləyərək, Yer kürəsini tərk edib. Tənqid etməyin yeri yoxdu. Sonra milli üzvləri “feysbuk”da, “instaqram”da görür və motivasiyadan düşürlər”.

RƏŞAD hazırladı