Sabah millimizin növbəti yoldaşlıq oyunu baş tutacaq.

Yığmamız Latviya ilə qarşılaşacaq. Azərbaycan millisinin baş məşqçisi Canni de Byazi oyundan öncə keçirilən mətbuat konfransında iştirak edib. Çalışdırıcı görüş haqda bunları deyib:

- Sabah nəticə sizin üçün nə dərəcədə vacibdi?
- Əgər yaxşı oyun göstərsək, futbolçular öz mövqelərində bacardıqlarını edə bilsələr, nəticə qazanmaq mümkün olar. Nə zaman yaxşı oynasaq, topla rahat davransaq, bir-birimizi meydanda dəstəkləsək, hər bir rəqibə qarşı oynaya bilərik. Futbolda mümkün olmayan bir şey yoxdur. FIFA reytinqində 67-ci pillədə olan Şimali Makedoniya İtaliyaya qalib gəldi. Bunun üçün ən əsası özümüzə inanmalıyıq.

- Malta ilə oyunda komanda meydanda gərgin görünürdü. Bunun səbəbi nə idi?
- Artıq 30 ildi məşqçi kimi işləyirəm. Böyük və balaca komandalarda çalışmışam. İlk dəfədi belə söhbət eşidirəm. Malta ilə matçda ən böyük problem onlardan az qaçmağımız idi. Onlardan daha istəkli, aqressiv olmalıyıq. Oyundan əvvəl oyunçumuza Maltanın kapitanının şəklini göstərdim. Dedim ki, onlar burda gəzməyəcəklər, mübarizə üçün bizi gözləyirlər. Başa saldım ki, qələbə üçün döyüşmək lazımdı.

- Azarkeşlər nəticədən çox daha istəkli komanda görmək istəyir. Bu istiqamətdə hansı işlər görülür?
- Üç ötürmə verə bilmiriksə, hücum futbolundan söhbət gedə bilməz. Taktiki problemlər ola bilər. Amma texniki çatışmazlıqlar da var idi. Bu baxımdan inkişaf etməliyik. Birinci hissədə 2-3 epizod oldu ki, il ötürmələr düzgün olsaydı, təhlükəli ola bilərdik. Sabah əvvəlki sistemə qayıdırıq. Bu üzdən matçdan sonra bəhanə olmayacaq. Sabah hamımız milli forma altında Azərbaycan bayrağı üçün mübarizə aparmalıyıq.

- Sabah optimal heyətlə çıxış edəcəksiniz, yoxsa digər oyunçulara da şans veriləcək?
- Bədavi Hüseynovdan başqa hamı hazırdı. Heyəti görmək üçün tələsməyək, sabahı gözləyək.