“Məşq etməyən komandadan bundan artıq nəticə gözləməyə dəyməzdi. Komanda üzvlərinin çoxu müxtəlif yerlərdə işləyir. Ona görə də məşq edə bilmirik. Onlar məvacib aldıqları iş yerini qoyub komandanın məşqlərinə qatılası deyillər ki?! Cavab görüşü üçün Bakıya gələ bilməməyimizlə bağlı söz-söhbətə gəlincə, qrup oyunları zamanı qonşu rayonlara dost-tanışın verdiyi maliyyə hesabına səfər etmək olurdu. Ən uzaq səfərimiz Ağsu idi. Ora da birtəhər gedirdik. Bakıya isə gəlməyə, doğrudan da, pulumuz yoxdu. “Cəbrayıl”la oyuna futbolçularımızın çalışdığı müəssisə, təşkilat və çayxanaların rəhbərləri də gəlmişdi. 1:5 hesabı ilə yenildiyimiz qarşılaşmadan sonra onlar da cavab oyununun mənasız olduğunu söyləyib, işçilərinə Bakıya getməyə icazə verməyəcəklərini bildiriblər. İndi siz deyin, biz necə bu həftə Bakıya gələk?”

“Mən bu komandanın kapitanı kimi rayonumun təmsilçisinə kömək etməyə çalışdım. Ancaq belə münasibətlə çox uzağa getmək olmaz. Zəmanət məktubu? Mənim belə sənəddən, ümumiyyətlə, xəbərim yoxdu. Fikrimcə, AFFA-ya “İmişli” tərəfindən belə məktub təqdim olunmayıb. Əks halda, məktubu verən orqanlar komandanın səfər xərcini qarşılayardı. Növbəti mövsümdən İmişlini Region Liqasında “Zəfər yolu” adlı komanda təmsil edəcək. Təsis etdiyimiz bu klubun hazırda 5 yaş qrupu var və məşqlərimizi davam etdiririk. Ümid edirəm ki, yeni yaranan klub indikindən daha fərqli və uğurlu olacaq”.