Cavid Hüseynov futbolçularına və azarkeşlərə təşəkkür etdi
Region Liqasında pley-off matçlarına start verilib.
Dünən artıq iki qarşılaşma keçirilib ki, onlardan birində “Ağsu Siti” “Karvan”ı 2:0 hesabı ilə yenibsə, digər cütdə “Cəbrayıl” səfərdə “İmişli” üzərində böyükhesablı qələbəyə sevinib. Rayonun eyni adlı komandasına 5:1 hesabı ilə qalib gələn Cavid Hüseynovun çalışdırdığı komanda bununla da cavab qarşılaşmasını demək olar formallığa çevirib. Bəs görəsən, Hüseynov yetirmələrinin səfərdə belə asan qələbə qazanacağını gözləyirdi?
Gənc məşqçi “Football-plus.az” saytına açıqlamasında bunları söylədi: “Oyuna ciddi hazırlaşmışdıq. Bilirdik ki, bizi çətin səfər gözləyir. Futbolçularım meydana yüksək istək və həvəslə çıxaraq böyükhesablı qələbə qazanmağı bacardılar ki, buna görə onlara təşəkkür edirəm”.
Baş məşqçi səfərdə onlara dəstək olan azarkeşlərə, rayonun icra hakimiyyətinin əməkdaşlarına təşəkkür etməyi də unutmadı: “Oyunu izləyənlər arasında komandamızın 100-ə qədər azarkeşi də var idi. Onların bəziləri Bakıdan gəlmişdisə, bəziləri Cəbrayıl işğal olunan vaxt Biləsuvara üz tutan cəbrayıllılar idi ki, 90 dəqiqə dayanmadan komandaya dəstək oldular. Stadionda mükəmməl ab-hava yartmışdılar. Azarkeşlərimizlə yanaşı, Cəbrayılın İcra hakimiyyətinin nümayəndələri də oyunu izləyirdilər. Matç başa çatandan sonra onlar komandanı təbrik edib, qarşıdakı oyunlarda bizə uğurlar arzuladılar. Onu da bildirdilər ki, daim komandanı yanında olacaqlar”.
Digər xəbərlər
