Rövşən Hüseynli bir vacib məqamı nəzərə almayıb - AÇIQLAMA
Rövşən Hüseynli karyerasını Rusiyada davam etdirəcək.
Futzalçının transfer olduğu "Torpedo" Nijni Novqorod şəhərini təmsil edir. Rusiya superliqasında 9 komanda mübarizə aparır. “Torpedo” hazırda liderdi. Nijni Novqorod təmsilçisi indiyədək tutul qazanmayıb. Komanda son oyununu əsas rəqibi "Tümen"ə qarşı keçirib - 3:3. Növbəti rəqib aprelin 4-də "Yekaterinburq" olacaq. Rövşən Hüseynlinin həmin qarşılaşmada debüt edəcəyi gözlənilir.
Keçid barədə Rövşən Hüseynlinin təəssüratını öyrəndik. O, "Football-plus.az" saytına bunları dedi:"Torpedo" ilə 2020-ci ildə də danışığım olmuşdu. Amma danışıqlar qeyri-rəsmi idi. Bu klubun qapıçılar üzrə məşqçisi millinin də məşqçisidi. Xorvatiyada olduğumuz müddətdə danışıq baş tutmuşdu. Sonra pandemiya oldu, danışıqlar dayandı. Bu dəfə bir həftə əvvəl rəsmi təklif gəldi. Rusiya çempionatını həmişə izləyirəm. Hər bir futzalçının istəyi orda çıxış etməkdi. Qərar vermək çətin oldu. Mənə menecerim dəstək verdi. Birlikdə bu məsələni yoluna qoyduq və getmək qərarına gəldim. Müqavilə hələ ki 2 aylıqdı. Sonrasını zaman göstərəcək. İlk dəfə legioner həyatı yaşayacam. Məqsəd çempion olmaqdı".
Görəsən, təcrübəli qolkiper məlum hərbi vəziyyəti, yerli klublara tətbiq olunan qadağanı nəzərə alıb:"Təbii, olanlardan xəbərdaram. Qərar verərkən bunu heç fikirləşmədim. Sadəcə, təklif gələndən sonra bunun karyerama necə təsir göstərəcəyini düşündüm. Bir sözlə, ancaq futbol tərəflni fikirləşib, qərar verdim. İnşallah, gərgin vəziyyət tezliklə aradan qalxar. Ümumi təəssüratım belədi ki, 2014-cü ildən çıxış etdiyim "Araz Naxçıvan"dan ayrılmaq çətindi. Bu səviyyəyə çatmağımda klubun çox böyük payı var. Amma bu, idmançı karyerasıdı. Həmişə inkişaf etmək, zirvəyə doğru getmək lazımdı. Rəhbərliyə təşəkkür edirəm ki, bu yolda mənə "yaşıl işıq" yandırdılar, qarşımı kəsmədilər. İrəli getməyim üçün tələb olunan lazımi şərait yaratdılar. Ümid edirəm ki, növbəti müsahibəmiz Rusiya çempionu kimi olar".
GÜNAY VƏLİYEVA
Digər xəbərlər
