Alesio Rövşənin "Araz Naxçıvan"dan ayrılmasına sevinib - AÇIQLAMA
Futzal millimizin və "Araz Naxçıvan"ın qapıçısı Rövşən Hüseynli karyerasını Rusiyada davam etdirəcək.
Futzalçı "Torpedo" klubunda forma geyinəcək. İllərdi "Araz Naxçıvan"ın uğurları üçün çalışan qolkiperin gedişi klubda necə qarşılanıb? Vitse-prezident Mahmud Sadıqov "Football-plus.az" saytına bunları söylədi: "Rövşənin komandanın çempionluqlarında böyük əməyi var. Bunu heç birimiz danmırıq. Onun əməyini həmişə qiymətləndiririk. Rövşən millidəki uğurlu çıxışı ilə də yadda qalıb. Təklif gələndə ilk olaraq bu məsələni Joze Alesio Da Silva ilə müzakirə etdim. Çünki heyətin komplektləşməsində əsas rol baş məşqçiyə məxsusdu. Mən komandaya bir oyunçu gətirmək istəsəm belə, onun rəyi olmadan bu işə qol çəkmirəm. Alesio dedi ki, Rövşənin getməsi həm özü, həm də milli komanda üçün çox yaxşı təcrübə olar. Getməyinə etiraz etmədi. Əksinə, sevindiyini söylədi. Bu üzdən mən də etiraz etmədim. Daha güclü çempionatda çıxış edəcək. Reqlamentə görə hansısa komandada qapıçı problemi yaranarsa, azad agent statusuna malik birini istənilən vaxt cəlb etmək mümkündü. Biz də yeni qapıçı ilə danışıq aparırıq. Bir neçə günə dəqiqləşəcək".
GÜNAY VƏLİYEVA
