Şamaxı şəhər stadionu premyer-liqaya “qucaq açmağa” hazırdı - AÇIQLAMA
“Keşlə”nin “Şamaxı” olmasına və eyniadlı rayona köçməsinə sayılı günlər qalıb.
Hansısa fors-major hadisə yaşanmasa, Sənan Qurbanovun çalışdıracağı “Şamaxı” martın 18-də şəhər stadionunda ilk oyununda “Sumqayıt”ı qonaq edəcək.
Bəs görəsən, rayon ictimaiyyəti, Mirzə Ələkbər Sabirin yerliləri böyük futbolun Şamaxıya dönüşünə necə hazırlaşırlar? Bununla bağlı hansısa tədbir planlaşdırlıb? Bizi maraqlandıran suala cavab tapmaq üçün rayonun Gənclər və İdman İdarəsi ilə əlaqə saxladıq. İdarənin rəis müavini Bəhlul Əliosmanovun məsələyə reaksiyası belə oldu:
“Şamaxının ölkənin futbol ailəsinə qoşulması hamımızı sevindirir. Şamaxıda futbol üçün hər cür şərait yaradılıb. Komandanın ilk ev oyununu bu ay rayonda keçirəcəyindən xəbərimiz var. Ancaq hələ ki bununla bağlı heç nə planlaşdırılmayıb. Böyük ehtimalla hansısa tədbir təşkil olunacaq. Martın 18-nə hələ var. Qarşıdakı günlərdə bununla bağlı müzakirələr olacaq”.
Şamaxı şəhər stadionunun direktoru Elşad Hüseynov isə bunları söylədi:
“Stadionumuzda ilk oyun martın 18-də olacaq. Həmin gün 15.00-da “Şamaxı” “Sumqayıt”la qarşılaşacaq. Arenada süni işıqlandırma sistemi olmadığından matç belə erkən saatda start götürəcək. Rayonda oyuna maraq çox böyükdü. Arenada qarşılaşmanı qəbul etmək üçün heç bir problem yoxdu. Bəzi xırda işlər qalıb ki, onu da tamamlamaq üzrəyik”.
RƏŞAD
Digər xəbərlər
