Tahir Süleymanov “Keşlə”nin Şamaxıya köçməsini müsbət addım sayır - AÇIQLAMA
Çoxdan planlaşdırılan köç, nəhayət, həyata keçirilir.
“Keşlə” adını və təmsil etdiyi şəhəri dəyişərək “Şamaxı” olur. Bu, futbolun bölgələrə köçürülməsi istiqamətində atılmış alqışalayiq addımdı. Şamaxılıların yeni komandalarını necə qarşılaşyacağını martın 18-də biləcəyik. Həmin gün komanda yeni azarkeşləri önündə ilk oyununa çıxacaq. Bununla da “Keşlə” adı ölkə futbolunun tarixinə qovuşacaq.
Tarixən Şamaxıda futbol klubu olub, amma uzun müddət fəaliyyət göstərməyib. Bəllidi ki, rayon camaatı bu idman növü üçün darıxıb. Görəsən, Şamaxının futbol ictimaiyyəti prosesi necə qiymətləndirir? Sualımıza cavab tapmaq üçün rayonun məşhur simalarından sayılan Tahir Süleymanovla əlaqə saxladıq. Təcrübəli futbol eksperti əslən şamaxılı kimi “idmanın şahı”nı dərindən bilən, anlayışı olan tək-tük şəxslərdəndi. Sabiq FIFA referisindən “Keşlə”nin “Şamaxı” olmasına münasibət öyrəndik. Ondan bu köçün bölgələrdə futbolun inkişafına təkan olub-olmayacağını soruşduq:
“Azərbaycan futbolunda bölgələrimiz tarixən təmsil olunub və önəmli yer tutublar. Onlarla adlı-sanlı futbolçularımız regionlarda yetişib, üzə çıxıb. Təəssüf ki, son illər futbolumuz 8 komandalı premyer-liqaya möhtac qalıb. Onların da əksəriyyəti Bakı və Abşeronu təmsil edir. Buna son qoyulmalıdı. Ənənəvi futbol mərkəzlərimiz - Gəncə, Tovuz, Şəmkir, Qazax, Lənkəran, Masallı, İmişli, Bərdə, Quba, Qusar, Şirvan, Sabirabad, Salyan, Zaqatala, Qax, Mingəçevir, Naxçıvan böyük futbolun yolunu gözləyir... O ki qaldı "Keşlə"nin Şamaxıya köçməsinə, bunu müsbət məqam kimi qiymətləndirmək olar. Vaxtilə rayonu təmsil edən "Şirvan" elitada çıxış edib. Şamaxıda futbol çox sevilir. "Şamaxı"nı əsl Şamaxı komandası etmək üçün çox iş görülməlidi, təkcə ad dəyişməklə iş bitməz. Bu da kluba cavabdeh şəxslərin atacağı addımlardan asılıdı. Əks halda verilən qərar bumeranq rolunu oynaya bilər. Ümumilikdə isə Azərbaycanın tarixi ənənələrinə uyğun futbol xəritəsi yenidən cızılmalı, bütün bölgələrimizdə böyük futbol dirçəlməlidi”.
RƏŞAD
Digər xəbərlər
