Bir neçə gün əvvəl “Şamaxı”nın ilk ev oyununun aprelin 9-u, saat 14.00-da Şamaxı şəhər stadionunda baş tutacağanı xəbər vermişdik.

Buna baxmayaraq, PFL məsələ ilə bağlı rəsmi məlumat vermirdi. Ancaq dünən səhər saatlarında qurum səssizliyi pozdu və “Şamaxı” – “Neftçi” matçının aprelin 9-u, saat 14.00-da Şamaxıda keçiriləcəyini açıqladı. Bununla da böyük futbolun Şamaxıya qayıdacağı rəsmən elan olundu.

Görəsən, xüsusi tədbir nəzərdə tutulubmu? İlk matçda hansı məşhur simaları görə biləcəyik? Bu və başqa suallara cavab tapmaq üçün PFL-in Texniki İdman Departamentinin rəhbəri Elgiz Abbasovla danışdıq.

- Bir həftədən artıqdı ki, mətbuatda Şamaxıda oyunun tarixi ilə bağlı xəbərlər yayısa da, PFL bunu bu gün (dünən) açıqladı. Bunun özəl bir səbəbi var?

- Mətbuatda martın ikinci yarısından etibarən belə yazılar dərc olunur. Yəqin bunu nəzərə alaraq PFL-in gec açıqlama verdiyini düşünürsüz. Amma bizə görə hər şey planlaşdırıldığı kimi oldu və artıq bu gün məsələ ilə bağlı rəsmi açıqlama verildi.

- Böyük futbolun Şamaxıya qayıtması münasibəti ilə xüsusi tədbir nəzərdə tutulubmu? Tutulubsa, PFL və yerli İcra Hakimiyyəti hansı tanınmış qonaqları dəvət edib?

- PFL olaraq son bir ayda iki dəfə Şamaxı şəhər stadionuna səfər etmişik. Sevindirici haldı ki, tarixi əhəmiyyətə malik bölgəmizdə standartlara cavab verən stadion var. İnfrastruktur baxımından arenanı öncüllərdən saya bilərik. Dünən “Şamaxı” klubunun nümayəndələri və yerli ictimaiyyətlə görüşdə bir daha aydın oldu ki, şəhərdə futbola maraq var. Açılış mərasimi ilə bağlı klubla şifahi danışığımız olub. Bunu təşkil edib-etməmək birbaşa klubun ixtiyarındadı. Bizə rəsmi müraciət olunub, ssenari təqdim olunsa, mövqeyimizi ortaya qoya bilərik. Qonaqlar baxımından danışsaq, PFL Şamaxıdakı açılış oyununda rəhbərlik səviyyəsində təmsil olunmağı planlaşdırıb.

- Jurnalistlərin də bu qarşılaşmaya böyük marağı var. PFL onların səfərini təşkil etməyi düşünürmü?

- Xeyr, PFL tərəfindən jurnalistlərin Şamaxıya aparılması nəzərdə tutulmayıb.

- "Şamaxı"nın ev oyunları həmişə belə erkən saatlarda başlayacaq?

- Açılış oyunu olduğunu və bütün mümkün variantları nəzərə alaraq, 14.00-da təyin etmişik. Görüşlərin başlama saatı hava şəraitinə, həmçinin stadionunun infrastrukturuna uyğun təyin olunacaq.

SƏNƏM FƏRHADOVA