Türkiyə çempionatında ötən mövsüm öz oyunu və məhsuldarlığı ilə diqqət çəkməyi bacaran ''Göztəpə''li Romulo önəmli klublardan təkliflər almaqda davam edir.

"Football-plus.az" xəbər verir ki, 193 sm boya malik olan 23 yaşlı braziliyalı hücumçu geridə qoyduğumuz mövsümdə 33 oyunda 17 qol, 10 məhsuldar ötürməlik performans sərgiləmişdi.

Fiziki göstəricilərini və yaşını nəzərə aldıqda ona marağın böyük olması başadüşüləndi. Amma ''Göztəpə'' rəhbərliyi 15 milyon avrodan aşağı olan təkliflərin heç birini dəyərləndirmək niyyətində deyil. İndiyə qədər bu oyunçuya görə İzmir klubunun qapısını ''Əl-Vəsl'', ''Ayaks'', ''Feyenoord'', ''Roma'', ''Monako'', ''Fulhem'', ''Anderlext'' kimi tanınmış klublar döyüb.

Türkiyə mətbuatının yazdığına inansaq, ən son bundesliqanın iddialı klublarından olan ''Leyptsiq'' də ''Göztəpə'' ilə danışıqlara başlamaq istəyib. Amma Türkiyə klubu danışıqlar prosesinə 15 milyon avrodan başladığına görə almanlar geri çəkiliblər. Romulo Paranaense ''Atletiko''sunun yetirməsidi. ''Göztəpə'' ondakı potensialı kəşf edərək 2024-ün yanvarında bu futbolçunu icarəyə götürmüşdü. Bu ilin yanvarında isə izmirlilər braziliyalılara 2,5 milyon avro ödəyərək onunla ilə 2028-ci ilə qədər daimi əsasda müqavilə imzaladılar.

Türkiyə daxilindən isə ''sambaçı''ya əsasən ''Trabzonspor'' maraq göstərir. Romulonun yay transfer dönəminin sonuna qədər ''Göztəpə''dən ayrılacağı gözlənilir.