Türkiyədə bahalı keçidlər və satışlar bir qayda olaraq nəhəng klublar tərəfindən reallaşdırılır. Amma bu dəfə ''Göztəpə'' tarixi bir satışın astanasındadı.

Belə ki, bu klubun üzvü olan Romulo artıq ''Leyptsiq''ə keçmək üzrədi. Ötən mövsüm Türkiyə çempionatının kəşflərindən olan braziliyalı forvard son detalları razılaşdırmaq üçün Almaniyaya yollanıb. Son anda bir problem çıxmasa, Romulo ''öküzlər''lə beşillik müqavilə imzalayacaq.

Transferin maddi detallarına gəlincə, ''Göztəpə'' bu satışdan 20 milyon avro qazanacaq! Müqavilədə şərtlərə bağlı olan 5 milyon avroluq bonus maddəsi, eləcə də sonrakı satışdan 10 faiz pay da mövcuddu. Qeyd edək ki, ''Atletiko Paranaense''nin yetirməsi olan və ''Göztəpə''yə ötən yay məhz bu klubdan icarə əsasında gələn 23 yaşlı forvard 33 rəsmi oyunda 17 qol, 10 məhsuldar ötürməlik performansla diqqətləri üzərinə çəkdi. ''Göztəpə'' Avropa klublarının bu futbolçuya olan marağını nəzərə alaraq və braziliyalılara bu yay 2,5 milyon avro ödəyərək Romulonu daimi əsasda transfer etdi. Və göründüyü kimi indi də onu 20 milyon avroya satır!

Təbii ki, bu, açıq-ara fərqlə klub tarixinin ən bahalı satışıdı. Buna qədər İzmir klubu ən bahalı satışını 2022-ci ildə reallaşdırmış və nigeriyalı Obinna Nvobodonu 2,7 milyon avroya ''Sinsinnati''yə göndərmişdi. Romulo Türkiyə çempionatı tarixinin isə ən bahalı 8-ci satışı olacaq.