Qəzetimizin ötən sayında elitaya yüksəlmək vəzifəsinin öhdəsindən gələ bilməyən “Mingəçevir”in taleyinin sual altında olduğunu yazmışdıq. Ramiz Məmmədov kimi iddialı mütəxəssis bir komandadan ayrılırsa, deməli, orda işlər qaydasında getmir. Getsəydi, Ramiz bəy də postunda qalar, “nur şəhəri”nin təmsilçisini elitaya gətirməklə bağlı növbəti dəfə cəhd edərdi. Məmmədov bundan sonra “Karvan-Yevlax”ı hədəfinə çatdırmağa, yəni elitaya qaytarmağa çalışacaq.

Düzdü, “Mingəçevir”lə bağlı da bəzi nikbin xəbərlər var. Guya klubun rəhbəri Rafael Bünyatov yeni sponsorla anlaşıb. Ötən mövsümü 225 min manat borcla qapayan "işıqçılar"ın dövlətdən ayrılan 300 min manatın ümidinə qalmayacağı, növbəti mövsüm təxminən 800 min manatlıq büdcə ilə oynayacağı deyilir.

Amma reallıq budu ki, nə vaxt klub rəsmilərinə müraciət etsək, yalnız bir cavab alırıq: “iclas olsun, ondan sonra suallara cavab tapılacaq”. Görünür, Ramiz Məmmədov da elə belə cavablardan bezdi və getdi. Yeni gələcək baş məşqçinin bezməyəcəyinə kim zəmanət verə bilər?

ORXAN