“Daha az maaşla yeni müqavilə təklif etdilər” - Füzuli Məmmədov ayrılığın detallarını açıqladı
Füzuli Məmmədov ötən mövsüm sonuncu pillədə qəbul etdiyi “Mingəçevir” ilə az qala inanılmazı bacardı.
Baş məşqçi “nur şəhəri”nin təmsilçisini 4-cü pilləyə daşıdı. Əlbəttə, mövsümü ilk üç pillədə başa vuran “Qəbələ”, “İmişli” və “Karvan”a çatması inandırıcı deyildi.
Bu arada “Azerbaijan Sport Talents Academy” də kluba sponsorluğu boynuna götürdü. Məntiqlə işlər yoluna düşməli, “Mingəçevir” artıq elitaya vəsiqə qazanmağın planlarını cızmalıydı. Ancaq mövsümlərarası fasilədə bu klubla bağlı heç bir xoş xəbər yoxdu.
Hə, bir yarımçıq xəbər var, deyilənə görə, klubun adı “ASTA Mingəçevir” FK yox, “ASTA Mingəçevir” İK olacaq. Yəni klubun nəzdində başqa idman növləri üzrə bölmələr də fəaliyyət göstərəcək. “Mingəçevir” ötən həftə baş məşqçi Füzuli Məmmədovla yolları ayırdığını rəsmən açıqlamadan artıq Ramiz Məmmədovu “sükan arxasına” gətirdiyini açıqladı.
Biz isə Füzuli bəylə əlaqə saxlayıb, ayrılığın detallarını öyrənməyə çalışdıq:
“Çempionat qutarandan sonra mənə dedilər ki, maliyyə sıxıntımız var. Amma getməklə bağlı bir şey deməmişdilər. Klub mənə bildirmişdi ki, yeni sponsor maliyyəni azaldır. Maaşın azaldılmasını istədilər. Həm futbolçuların, həm də məşqçilər heyətinin. Gedəcəyimi bilmirdim. Söz-söhbət gəzəndə mən elə bilirdim ki, komandada qalacam. Müqaviləmin müddəti davam edirdi. Klub mənə daha az maaşla yeni müqavilə təklif etdi, mən də razılaşmadım, müqaviləyə də qarşılıqlı şəkildə xitam verdik. Əlbəttə, kompensasiya aldım. Hələ ki “Mingəçevir”dən getməyim yenicə rəsmiləşib. Hansısa təklif yoxdu”.
MÜZƏFFƏR QULUZADƏ
Digər xəbərlər
