Düzdü, ölkəmizi avrokuboklarda təmsil edən komandalardan “Neftçi” hələ dünən ilk yoxlama oyununu keçirdi. Ancaq “Sabah”la “Qarabağ” Avstriyanın Tirol bölgəsində, “Zirə” isə Türkiyənin Bolu şəhərində keçirilən təlim-məşq toplanışı artıq başa vurub.

Belədə komandaların beynəlxalq arenadakı sınağa hazır olduğunu düşünmək olar. Ancaq bu matçlarla bağlı qorxunc məqam var ki, mütləq diqqət yetirməliyik. Belə ki, Çempionlar Liqasında yarışacaq “Sabah” yoxlama oyunlarında qələbə qazana bilmədi. “Universitatya Krayova” və “Ferentsvaroş” ilə heç-heçə edən “bayquşlar” “Polesye” önündə darmadağın oldu - 1:4.. Avropa Liqasında yarışacaq “Qarabağ” da ümidləri doğrultmadı. Düzdü, ağdamlılar “Zirə” və “Avstriya “Tirol”u üzərində qələbə qazandı. Ancaq “qartallar”ın “köhlən atlar”dan zəif olduğu əvvəldən bəlli idi. “Tirol” isə ölkə çempionatının 2025/26 mövsümünü 12 komanda arasında 11-ci pillədə başa vurub. "Metallist 1925"ə 2:6, "Ferentsvaroş"a 0:1 hesabıyla uduzmaq isə ciddi həyəcan siqnalıdı.

Bəli, Qurban Qurbanov Xarkov təmsilçisinə qarşı oyunda aparıcı futbolçuların əksəriyyətinə şans vermədi. Ancaq həmin məğlubiyyət də komandada rotasiya potensialının zəif olduğunu ortaya qoydu. Xüsusilə müdafiə xəttində. Kevin Medinanın yoxluğu, Elvin Cəfərquliyevin formada olmaması özünü dərhal büruzə verdi. Həmin boşluqları "Fenetsvaroş"la oyunda da hiss etdik. Bunu Qurban bəy də dərk edir ki, daha çox zamana ehtiyac duyduqlarını bildirdi.

"Neftçi"yə gəlincə, düzdü, ÇFR ilə matç uzun fasilədən sonra kollektivin bir araya gəlməsi idi. Ancaq bu fakta sığınmaq olmaz. Ona görə ki, rəqib də yaydakı ilk yoxlama matçını keçirdi. Razıyıq ki, "ağ-qaralar" oyun ərzində bir çox hücum təşkil etdi, fərqlənməyə can atdı. Lakin ÇFR rəqibinə hansısa komponentdə uduzmadı və lazım olan qolları da vurdu. Hətta bu baxımdan bakılıların xeyli geridə qaldığını deyə bilərik.

İstənilən halda, avrokubokdakı təmsilçilərimiz yoxlama oyunlarında ümid vermədi. Təki rəsmi oyunlarda belə olmasın!

KƏNAN BAHADIR