"Sabah" sabah Çempionlar Liqasının 1-ci təsnifat mərhələsi çərçivəsində "Nyu Seynts" ilə qarşılaşacaq.

"Football-plus.az" xəbər verir ki, Masazır təmsilçisinin baş məşqçisi Valdas Dambrauskasın oyunöncəsi mətbuat konfransı keçirilib.

- İlk növbədə, hamını yeni mövsümün başlanması münasibətilə təbrik edirəm. Ümid edirəm ki, bu mövsüm bizim üçün ötən mövsüm kimi uğurlu olacaq. Üzərimizdə böyük məsuliyyət var, çünki Azərbaycanı Çempionlar Liqasında təmsil edəcəyik. Ümid edirəm ki, bu, bizdə uğurlu alınacaq. Sabahkı oyunu böyük həyəcanla gözləyirik. Avstriyada iki həftəlik hazırlıq keçdik və hesab edirəm ki, matça tam hazırıq. Sabah ən yaxşı oyunumuzu nümayiş etdirəcəyik.

- Mövsüm öncəsi toplanışdakı yoldaşlıq oyunlarında "Sabah"ın çıxışından razı qaldızmı?
- Avstriyada çox güclü rəqiblərə qarşı oynayaraq çox yaxşı toplanış keçdik. Bu günə qədər 21 məşq etmişik, lakin mən istərdim ki, onların sayı 25-26 olsun. Amma bütövlükdə düşünürəm ki, futbolçularımız yaxşı formadadı. Düzdü, komandaya yeni qoşulan və uyğunlaşmağa ehtiyacı olan oyunçular da var. Biz toplanışda məhz buna nail olmağa çalışırdıq. Keçən mövsümün eyni dövrü ilə hazırkı vəziyyətimizi müqayisə etsək, düşünürəm ki, klub olaraq bir addım irəli atmışıq. Bu dəfə daha yaxşı hazırlaşmışıq.

- Rəqib barədə nə deyə bilərsiniz?
- Hazırda detallara toxunmaq istəməzdim. Bütün lazımi məlumatları futbolçularıma çatdırmışam. Rəqin çox təcrübəli komandadı, heyətində uzun müddətdi birlikdə çıxış edən futbolçular var. Ötən mövsüm daxili çempionatda ən yaxın izləyicilərini demək olar ki, 20 xal qabaqladılar. Hər oyuna qələbə üçün çıxırlar. Onlara kiçik şans versəniz, bundan dərhal istifadə edəcəklər. Buna görə də ilk növbədə öz oyunumuz barədə düşünməliyik.