Sabah ölkə kubokunun final oyunu keçiriləcək.

“Football-plus.az” xəbər verir ki, oyunöncəsi mətbuat konfransında “Sabah”ın baş məşqçisi Valdas Dambrauskas jurnalistlərin önünə çıxıb.

- Burda olmaq mənim üçün şərəfdi. Hər ölkədə kubok finalı böyük hadisədi. Bəzi ölkələrdə iki, bəzilərində üç kubok var. “Zirə”ni final münasibəti ilə təbrik edirəm. Hər kəsi tribunaya çağırıram. Ötən mövsüm kuboku qazanmışıq. Karyeramda çox kubok finalı olub. Çox çətindi. Sabah dramatik, həyəcanlı oyun olacağına ümid edirəm.

- Mümkün panalti seriyasına hazırlaşmısız?
- Əlbəttə. Bu mənim üçün əhəmiyyətlidi. Tarixi fürsətdi. Oyunçular, məşqçilər olaraq, əlimizdən gələni edəcəyik. Böyük səbirsizliklə oyunu gözləyirik. Hər nəticəni gözləyirik. Yorğunluq da ola bilər. Səmimi olsam, penaltilər üzərində işləməmişik. Lazım olsa, kimə güvənəcəyimi bilirəm.

- Sizin qələbəniz “Neftçi” və “Qarabağ” üçün də vacibdi. Bu məqam üzərinizdə əlavə təzyiq yaradır?
- Ğz üzərimizdə necə təzyiq hiss edə bilərik ki?! Belə suallara nifrət edirəm. Başqa şeylər düşünmürük. Ancaq öz oyunumuzu düşünürük. 3-cü komanda bizi maraqlandırmır. Qalib gəlsək, azarkeşlərimizi sevindirəcəyik. Başqa şeydən danışmağın mənası yoxdu.

- 7 dəfə kubokun qalibi olmusuz. Bu amil “Sabah” üçün əlavə üstünlükdü? “Zirə” isə iki dəfə finalda oynayıb. Bunu da onların üstünlüyü kimi hesab etmək olar?
- Keçmişdə qazanılan uğur keçmişdə qalır. Bunları fərqli komandalarda qazanmışam. Əlavə finallar səni yaxşı məşqçi etmir. İnanıram ki, ən yaxşı komanda sabah qalib olacaq. Dramatik, qollu oyun olacağına inanıram.

- “Zirə”, adətən, belə oyunlarda “beşli” müdafiə ilə oynayır. Sirr deyilsə, siz hansı taktiki sxem hazırlamısız?
- Hər şeyi desəm, heç nəyin marağı qalmayacaq (gülür). Üç dəfə qarşılaşmışıq, çətindi. Bir-birimizi böyük sürprizlər gözləmir. Kiçik detallar oyunu həll edəcək. Əvvəlki oyunlara necə hazırlaşmışıqsa, sabah da belə olacaq. Planlarımız var. Üzərimizdə təzyiq yoxdu. Sabah istədiyimiz oyunu sərgiləsək, ən yaxşı komanda biz olacağıq.

- Finalın mövsüm başa çatandan sonra olması daha yaxşıdı, yoxsa indi?
- Bu barədə nəsə düşünmürəm. Azərbaycana gəlmişəm, təşkilatçılığa, qaydalara hörmətlə yanaşıram. Mənə görə fərqi yoxdu. Bu ölkənin böyük futbol tarixi var. Nə vaxt deyilirsə, o vaxt oynamalıyıq.

- Rəşad Sadıqovun komandalarını bir neçə dəfə böyük hesabla məğlub etmisiz. Sabah daha aqressiv komanda görəcəksiz.
- Bu finaldı. Statistikanın önəmi yoxdu. “Omoniya” ilə ikinci oyunda burda məğlub olmuşduq. Keçmiş oyunların sabaha təsiri yoxdu. Biz bir-birimizi tanıyırıq. Finalda hər şey başa verə bilər. Hər iki komanda aqressiv olacaq. Azarkeşlərin həzz alacağı oyun olmasını istəyirəm.

MÜZƏFFƏR QULUZADƏ