Son günlər transferdə fəallaşan “Trabzonspor” heyətini daha bir oyunçu ilə gücləndirib.

“Football-plus.az” xəbər verir ki, ən son Batista Mendi və Nikolya Pepeni transfer edən Trabzon təmsilçisi indi də nigeriyalı forvard Pol Onuaçunu transfer edib. Yeri gəlmişkən, Pepenin keçidinin detalları bəlli olub. “Arsenal”dan ayrılan və sərbəst oyunçu statusunda olan tanınmış fransalı vingerlə birillik müqavilə imzalanıb. Onun illik qazancı 1,75 milyon avro təşkil edəcək. Bundan başqa, Pepeyə 1,6 milyon avro imza parası ödəniləcək.

Onuaçuya gəlincə, son klubu “Sauthempton” olan 29 yaşlı hücumçu birilliyə icarəyə götürülüb. İcarə haqqı kimi ingilislərə 1,5 milyon avro ödəniləcək. Bu məbləğ qarşı tərəfə iki hissəyə bölünməklə veriləcək. Müqavilədə gələn yay Onuaçunun daimi əsasda transfer edilməsi ilə bağlı maddə yoxdu. Futbolçunun Trabzonda illik qazancı 1,742 milyon avro təşkil edəcək. “Midtyullan”ın yetirməsi olan və peşəkar karyerasına bu klubda başlayan Onuaçunun ulduzu 2019-23-cü illərdə şərəfini qoruduğu Belçika təmsilçisi “Genk”də parlayıb. Təcrübəli futbolçu bu il fevralın 1-də 18 milyon avroya transfer olunduğu “Sauthempton”la 3,5 illik müqavilə imzalamışdı. Amma ötən mövsümün ilk dövrəsində “Genk”də 22 rəsmi oyuna 17 qol vuran futbolçunun İngiltərədə işləri istədiyi kimi getmədi. Onuaçu “Sauthempton”da cəmi 5 rəsmi oyuna çıxaraq qol vura bilmədi. Qaradənizlilərin yeni transferinin ən diqqətçəkən özəlliyi fiziki göstəriciləridi. Belə ki, nigeriyalının boyu 201 sm, çəkisi isə 93 kq-dı! Əsil taran tipli forvardlardan sayılan və cüssəsi ilə topu özündə çox gözəl saxlayan Onuaçi hava mübarizələrində də çox effektlidi. İndiki transfer dəyəri 13 milyon avro olan qaradərili oyunçu klub karyerası ərzində iştirak etdiyi 339 oyunda 164 qol, 34 məhsuldar ötürmə ilə fərqlənib. 2019-dan bəri şərəfini qoruduğu Nigeriya yığmasında isə 18 oyuna 3 qol vurub. Ümumiyyətlə, baş məşqçi Nenad Byelitsanın istəyi ilə “Trabzonspor”un bu yay əsasən fiziki cəhətdən güclü və ucaboy oyunçular transfer etməsi diqqəti çəkir. Belə ki, komandanın bu yay heyətinə qatdığı futbolçulardan 6-nın – Batista Mendi, Rayyan Baniya, Onuralp Çevikkan, Filip Benkoviç, Xoakin Fernandes və Pol Onuaçunun boyu 190 sm-i keçir!