Dünyaca ünlü ''transfermarkt'' saytı futbolcuların dəyərlərini yeniləyib.

Bu yay Türkiyəyə gələn bəzi dünya ulduzlarının dəyərlərinin aşağı düşməsi diqqət çəkib. Məsələn, ''Fənərbaxça''dan Marko Asensio ilə Milan Şkrinyarın, eləcə də ''Beşiktaş''lı Uilfrid Ndidinin dəyəri 3 milyon avro azalıb.

Yeni açıqlanan rəqəmlərə inansaq, hazırda Asensionun transfer qiyməti 17, Şkrinyar ilə Ndididə isə 12 milyon avrodu. Bu yay sürpriz şəkildə ''Mançester Yunayted''dən ayrılaraq icarə əsasında ''Trabzonspor''a keçən Andre Onana 5 milyon avro dəyər itirib. 29 yaşlı kamerunlu qapıçının indiki transfer qiyməti 20 milyon avrodu. ''Fənərbaxça''nın ''Əl-Nəssr''dən icarəyə götürdüyü kolumbiyalı forvard Con Duran da 5 milyon avro dəyər itirərək 35 milyon avroya geriləyib.

Bu yay Türkiyəyə gələn futbolçular arasında ən çox dəyər itirən isə Leroy Sanedi. ''Qalatasaray''ın ''Bavariya''dan pulsuz heyətinə qatdığı təcrübəli futbolçu 32 milyon avrodan 25 milyon avroya düşərək 7 milyon avro dəyər itirib. Artıq Almaniya yığmasına da çağırılmayan 29 yaşlı vinger karyerasında sonuncu dəfə 2016-cı ildə ''Şalke-04''də forma geydiyi dönəmdə dəyəri 30 milyon avrodan aşağı düşmüşdü. Həmin vaxt onun transfer qiyməti 18 milyon avro idi.