Türkiyəli futbolçu Kazımcan Karataş ilə bağlı maraqlı bir xəbər var. Sol müdafiəçi mövqeyində çıxış edən solaxay futbolçu Türkiyə yox, başqa bir yığmanın şərəfini qoruya bilər. Söhbət Şimali Makedoniyadan gedir. Kazımcan bu ölkənin federasiyasından təklif alıb. ''Altay''ın yetirməsi olan 23 yaşlı futbolçu 2022-dən ''Qalatasaray''a məxsusdu. O, Türkiyənin U-17, U-19, U-21 yığmalarında forma geysə də əsas komandada heç vaxt oynamaq şansı qazanmayıb. Kazımcan bunu nəzərə alaraq Şimali Makedoniyanın təklifini dəyərləndirmək qərarına gəlib. Onun ata tərəfdən bu ölkə ilə qohumluq əlaqələri var. Atası Mustafa Karataş bu yaxınlarda Şimali Makedoniya vətəndaşlığı alıb. Ona görə də Kazımcanın da vətəndaşlıq almaq fürsəti yaranıb. Bu prosesin iki ay içində tamamlanacağı və onun sentyabrda Millətlər Liqası matçlarında artıq bu ölkənin şərəfini qoruyacağı güman edilir. Hərçənd futbolçunun özündən bu məsələ ilə bağlı heç bir rəsmi açıqlama gəlməyib. Karataş ''Qalatasaray''a transfer olunduğu vaxtdan bu yana ''Ankaragücü'', ''Orenburq'' və son olaraq ''İstanbul BŞ''də icarə əsasında çıxış edib.