Futbol üzrə ölkə çempionatının 1-ci liqasında mövsümün necə yekunlaşmasından xəbərdarsız. “Şəfa” gərgin mübarizə sonucunda Misli premyer-liqasına yüksəldi, “Difai” isə aşağı – 2-ci dəstəyə yuvarlandı. Bu klubları kimlərin əvəzləyəcəyi də aydındı. Elitada uğursuzluğa düçar olan “Karvan-Yevlax” 1-ci liqaya qayıtdı. Bir də “Xankəndi” 2-ci liqanın qalibi kimi daha yuxarı divizionda mübarizə aparmaq hüququ qazandı.

Elita klublarında nələrin yaşandığı ilə bağlı müntəzəm yazırıq. Bəs 1-ci liqada son bir ayda əsasən hansı hadisələr baş verib?

“Mingəçevir”. “Qəbələ”yə pley-offda uduzmaqla elitaya dönə bilməyən, böyük məyusluq yaşayan "Mingəçevir"in baş məşqçisi Ramiz Məmmədovun müqavilə müddəti başa çatıb. Klubun onunla yola davam edib-etməyəcəyi həftəsonu keçiriləcək iclasda müəyyənləşəcək. “Mingəçevir” hazırda maliyyə problemi yaşamır, çox güman, Ramiz bəy növbətə dəfə elitaya vəsiqə qazanmağa çalışacaq.

“Səbail”. Mövsüm bitəndən sonra klubun satılacağı və hətta bundan sonra Qubanı təmsil edəcəyi ilə bağlı söz-söhbət yayıldı. Həqiqətən də iyunun 17-dən kluba gənc iş adamı Mirzə Bayrampur rəhbərlik edir. Ertəsi “dənizçilər” baş məşqçi Adil Şükürovla yolları ayırdı, bu posta Elnur Abdullayev gətirildi. “Səbail” dünən təcrübəli qapıçı Mehdi Cənnətov ilə heyətini gücləndirib. Odu ki, Rəşad Əzizlinin gedişi anlaşılandı. Təcrübəli qolkiperlə başa çatan müqavilə yenilənməyib. Yeni baş məşqçi Elnur Abdullayev futbolçunun komandada qalmasına ehtiyac duymayıb və tərəflər yolları ayırıb.

Xatırladaq ki, 32 yaşlı qapıçı 2025-ci ilin yayından etibarən Bayıl təmsilçisinin formasını geyirdi.

“Dənizçilər” sonuncu dəfə MOİK-də çıxış etmiş Zeynəddin Abdurahmanovla da “1+1” illik müqavilə imzalayıb. “Səbail”in yetirməsi olan 23 yaşlı yarımmüdafiəçi Azərbaycanın U-21 millisinin heyətində dörd oyun keçirib.

“Baku Sportinq”. Mayın 31-də baş məşqçi Röyal Nəcəfov ilə yollar ayrılıb. İyunun 10-da onun postunu Samir Ələkbərov tutub. Heyətdəki dəyişikliklərlə bağlı yenilik yoxdu.

“Şahdağ Qusar”. Mayın 26-da məşqçi korpusu ilə yollar ayrılıb. Babək Allahverdiyev, Elnur Abdullayev və Əlimirza Daşzəriniyə fəaliyyətləri üçün təşəkkür edilib. İyunun 3-də klubun idman direktoru vəzifəsinə Məhəmməd Bədəlbəyli gətirilib. Ayın 8-də boş qalan baş məşqçi postunu Fizuli Məmmədov tutub. Rafael Əmirbəyov və Əzəmət Ələkbərli köməkçi məşqçi, Rauf Mehdiyev qapıçı məşqçi vəzifəsinə təyin olunub. Müşfiq Nadirov, Famil Camalov, Aqostinyo Çipesse, Seymur Əliyev ilə müqavilənin müddəti bir il uzadılıb. “Baku Sportinq”dən 25 yaşlı Elməddin Sultanov, “Şəfa”dan 30 yaşlı Urfan İsmayılov və 28 yaşlı Vüqar Həsənov 1+1, “Şamaxı”dan 20 yaşlı Ravil Qafarov 1, “Səbail”dən 21 yaşlı Fəxri Məmmədli 1, “Ordu”dan 23 yaşlı Gülağa Əsədov və 23 yaşlı Mehrac Baxşalı 1, "Sabah"dan Seymur Məmmədov 1+1 illik transfer edilib. Çingiz Abbasov klubun meneceri vəzifəsinə təyin olunub.

“Xankəndi”. 2-ci liqada çempion olan klub 1-ci liqaya vəsiqə qazanıb. İyunun 13-də növbəti mövsümdə 1-ci liqada iştirak üçün AFFA-dan lisenziya alıb. “Xankəndi”nin məşqçilər korpusunda da dəyişiklik baş verib. Baş məşqçinin köməkçisi Ceyhun Cavadovla qarşılıqlı razılıq əsasında əməkdaşlığa son verilib. İyunun 24-də isə Elşad Manafov, Elməddin Hüseynzadə və Pərviz Qaraxanov ilə yollar ayrılıb.

“Karvan-Yevlax”. Premyer-liqada uğursuzluğa düçar olan komandada kütləvi ayrılıq baş verib. Baş məşqçi Fizuli Məmmədovla yollar ayrılıb. Komanda bir çox oyunçuları ilə də vidalaşıb. Kayl Spens, Pedro Mateuş, Qavi Thompson, Coy-Sleyd Mikels, Mois Nqvisani, Olavale Doyeni, İmani Barker, Emin Rüstəmov, Şakil Sno, Samuel Durrant yola salınıb. Yeni transfer xəbəri yoxdu.

MOİK və “Cəbrayıl” ilə bağlı yenilik yoxdu, “Zaqatala”nın baş məşqçisi Rüstəm Məmmədov klubun gələcəyi ilə bağlı narahatdı, yenə maliyyə problemi hökm sürür. Pley-off matçında “Qaradağ Lökbatan”ı məğlub edərək 1-ci liqadakı yerini qoruya bilən “Şimal”ın düşərgəsində hələ eyforiya ab-havası var.

İSRAYIL XEYRULLAYEV