1-ci liqada gərgin mübarizə davam edir. Düzdü, çempionun kimliyinə böyük ölçüdə aydınlıq gəlib. Hazırda 49 xalla lider olan “Şəfa”nın qarşıdakı 5 turda 7 xal fərqini əldən verəcəyi inandırıcı deyil. Bəs 2-ci kim olacaq? Pley-offda premyer-liqanın 11-ci komandası ilə kim oynayacaq?

Hazırda “Mingəçevir” 42 xalla 2-ci pillədədi. Bu komandanın sonrakı rəqiblərinə nəzər salaq.

“Cəbrayıl” (səfər)
“Zaqatala” (ev)
“Şahdağ Qusar” (səfər)
MOİK (ev)
“Səbail” (ev)

“Nur şəhəri”nin təmsilçisi 15 xal qazansa, sensasiya olmaz. Bir komanda üçün təqvim yalnız bu qədər yaxşı ola bilərdi. Yeganə çətin rəqib kimi “Səbail” görünür, amma “dənizçilər”lə də də “Şəfa”nı darmadağın etdikləri Mngəçevirdə qarşılaşacaqlar
“Mingəçevir”dən 1 xal geri qalan “Baku Sportinq” 3-cü yerdədi. Buzovnalıların təqvimi isə belədi:

“Şimal” (səfər)
“Difai” (ev)
“Cəbrayıl (səfər)
“Zaqatala” (ev)
“Şahdağ Qusar” (səfər)

“Göy-ağlar”ın da təqvimi rahatdı. Hətta “Mingəçevir”dən də. “Səbail” də eyni qaydada “Baku Sportinq”dən bir xal geridədi. 40 xala malik “dənizçilər”in təqviminə nəzər salaq:

“Difai” (səfər)
“Cəbrayıl” (ev)
“Zaqatala” (səfər)
“Şahdağ Qusar” (ev)
“Mingəçevir” (səfər)

“Səbail”in də yeganə çətin oyunu “Mingəçevir”lədi. Amma bu komandada qeyri-sabitlik var. Klub daxilində də yüngül pərişanlıq hökm sürür.
“Football-plus.az” “Baku Sportinq”lə “Mingəçevir”i ikinciliyə daha real namizəd kimi görür. “Baku Sportinq”in daha rahat qələbələr qazandığını nəzərə alsaq, buzovnalıları pley-offda, kim bilir, bəlkə də gələn mövsüm elitada görə bilərik. Düzdü, Ramiz Məmmədov təcrübəsinə görə Röyal Nəcəfovu üstələyir.

MÜZƏFFƏR QULUZADƏ