Türkiyə çempionatının 12-ci turunda ''Beşiktaş'' ''Antalyaspor''un qonağı oldu.

"Football-plus.az" xəbər verir ki, baş məşqçi Sərgən Yalçın, eləcə kapitan Orkun Kökçünün cəzalı olmasına baxmayaraq İstanbul nəhəngi ümidləri doğrultmağı bacardı. ''Qartal'' Abraham, Calo və Jota Silvanın qolları ilə 3:1 hesablı qələbə qazandı.

Son vaxtlar səfər oyunları komanda üçün daha uğurlu alınır. Evdəki son iki oyundan xalsız ayrılan ''Beşiktaş'' səfərdə isə məğlubiyyətsiz seriyanı 5 oyuna yüksəltdi (3 qələbə, 2 heç-heçə). Maraqlıdı ki, ''ağ-qaralar''ın sonuncu dəfə çempionatda belə seriyası 2020/21-in gedişində yenə də Sərgən Yalçının dönəmində olmuşdu. Həmin vaxt komanda rəqib meydanlarında ardıcıl 8 görüşdə uduzmamışdı. ''Antalyaspor''un başına bir neçə həftə öncə keçən Erol Bulutun yenə bu rəqibə qarşı qələbəyə həsrət qalması diqqət çəkdi.

Daha öncə ''Fənərbaxça''nı da çalışdırmış təcrübəli mütəxəssis məşqçi karyerasında ''Beşiktaş''a rəqib olduğu 12 superliqa matçının heç birində qalib gələ bilməyib (4 heç-heçə, 8 məğlubiyyət)! 12 turdan sonra xalını 20-yə yüksəldən ''qartal'' 6-cı pillədə qərarlaşıb.