Çərşənbə axşamı avrokubokların növbəti mövsümünün püşkü atılacaq.

“Turan Tovuz” bu yay Konfrans Liqasında oynamaq hüququ qazansa da, bildiyiniz kimi, UEFA-nın iyunun 2-də verdiyi qərarla bu hüquqdan məhrum olundu. Qərb təmsilçisi nüfuzlu vəkilin yardımı ilə məsələni İdman Arbitraj Məhkəməsinə (CAS) daşıyıb. Hətta Misli premyer-liqasında çıxış edən qalan 11 klub da həmin qurumu tovuzlulara dəstək xarakterli məktub göndərib.

“Turan Tovuz” camiəsi və azarkeşləri üçün ümidlə ümidsizlik arasında cəmi bir gün var. Sabah, yəni bazar ertəsi CAS-da Ehtiram Quliyevin klubunun şikayət ərizəsinə baxılacaq. Klubun mətbuat katibi Süleyman Tağıyevin dediyinə görə, rəsmi cavab alınan kimi ictimaiyyətə açıqlanacaq. Yüzə dözən ...bir gün də dözər!

İSRAYIL XEYRULLAYEV