“Məlumdu ki, U-17 və U-19 komandalarının varlığı premyer-liqa klubları üçün ən əsas tələblərdəndi. “Karvan-Yevlax” elitaya vəsiqə qazansa da, lisenziyalaşdırma prosesi zamanı bu problemlə üzləşəcəkdi. Çünki aşağı yaş qrupları üzrə komandaları yox idi. Bizimlə anlaşdılar və bu razılıq sayəsində lisenziya ala bildilər. Bəli, onlar bu müqaviləyə uyğun olaraq, ödənişləri ediblər. Lakin xatırlayırsızsa, UEFA “Qarabağ”ın Çempionlar Liqasında uğurlu çıxışına görə bütün premyer-liqa klublarına külli miqdarda vəsait ödədi. Baxın, biz də “Karvan-Yevlax”a ödənilən həmin vəsaitdən öz haqqımızı tələb edirik. Çünki həmin vaxt Yevlax təmsilçisi bizlə imzaladığı müqavilə sayəsində premyer-liqada idi. Mən bu məsələni həm idman hüquqşünaslarıyla, həm də UEFA-dakı dostlarla müzakirə etmişəm. Mənə bildiriblər ki, tam haqlıyam və bu vəsaiti tələb etməyə haqqım var. Bu barədə “Karvan-Yevlax”a məktub yazmışıq. Ümumiyyətlə, bu kluba U-17 və U-19 komandaları üçün çəkdiyimiz, demək olar ki, bütün xərclərin sənədlərini göndərmişik. Maliyyə çətinlikləri barədə məlumat vermişik. Ancaq hələ qarşı tərəfdən cavab ala bilməmişik. Ümid edirəm ki, tələbimizi müsbət qarşılayacaqlar. Əks halda, AFFA və UEFA-ya müraciət edəcəyik, haqqımızı tələb edəcəyik. Onsuz da həmin vəsait ali futbol qurumunun “həmrəylik ödənişləri” prinsipi əsasında klublara verilir və müəyyən hissəsinin uşaq futboluna ayrılması zəruridi”.

“Hazırda bir çox Azərbaycan klubu Avropa Futbol Klubları təşkilatına üzv olmağa can atır. Bir çoxu onsuz da üzvdü. İstəyirlər ki, nəhəng klublarla işbirliyi etsinlər. Bizdə belədi, hamı varlıyla yan-yana olmaq istəyir, kasıba baxan yoxdu. Halbuki öz klublarımızla da işbirliyi etmək olar. Bu yaxınlarda Klublar Komitəsinə təklif etdim ki, Abşeron Olimpiya İdman Kompleksinin stadionunu təmir edək, bölgələrdən gələn aşağı yaş qrupları üzrə komandalar burda ödənişsiz məşq etsin. Elə bizim akademiyada da 350-yə yaxın uşaq var. Ancaq heç bir klub bu təklifə müsbət cavab vermədi. Gərək bir olaq”.