Millimizin baş məşqçisi Ayxan Abbasovun iştirakıyla San Marino ilə oyundan əvvəl mətbuat konfransı keçirilib.

Mütəxəssis fikirlərini bölüşüb.

- Hər şey plan üzrə gedir. Geniş heyətimiz var. Sadəcə, Rəhim Sadıxov və Elvin Bədəlov xəstələndikləri üçün məşqlərin bir hissəsini buraxdılar. Bu da planları bir qədər pozdu. Təbii ki, hər iki matçda qalib gəlmək istəyirdik. Lakin bir yerdə olmaq, bu görüşləri keçirib hücumdakı problemləri görmək vacib idi. Son məğlubiyyətə gəlincə, yaxşı oynamağımıza baxmayaraq nəticə bizi qane etmədi. Hücumları məntiqli sonluqla tamamlamaq lazımdı. Futbolçuların oyun təcrübəsi ilə bağlı müəyyən problemlər var, lakin bu, bəhanə ola bilməz.

- Oyunun təhlili zamanı futbolçulara əsas hansı iradlar bildirildi?
- Komanda tərəfindən yaxşı hücumlar və mübarizə gördük, sadəcə sonluq çatışmadı. Bununla bağlı təhlil zamanı komandaya iradlarımızı bildirdik. Onlar bu ölkənin ən yaxşılarıdı və imkan yaranırsa, mütləq qol vurmalıdılar. Hücumları tamamlamaq üçün oyun təcrübəsi çatışmadı. Onlar millidə yaxşı oynamaq istəyirsə, klublarında 7-8 dəqiqə meydanda olmaqla kifayətlənməməlidilər.

- Heyət dəyişəcəkmi?
- Heyəti tamamilə dəyişəcəyik. Start heyətində Şahruddin Məhəmmədəliyev, Cəlal Hüseynov, Rahil Məmmədov, Rəhman Daşdəmirov, Tellur Mütəllimov, Rüfət Abbasov, Səbuhi Abdullazadə, Emin Mahmudov, Ayxan Hüseynov, Rüstəm Əhmədzadə və Renat Dadaşov meydana çıxacaq.

- Cəlal hansı mövqedə oynayacaq?
- O, universal oyunçudu. Biz onu hələ "Şamaxı"da başqa mövqelərdə sınamışdıq. Ehtiyac olsa, dayaq yarımmüdafiəçisi kimi də oynaya bilər.

- Abdulla Xaybullayev və Anton Krivotsyuk yalnız bu toplanışdan kənarlaşdırılıblar, yoxsa Millətlər Liqasını da buraxacaqlar?
- Bu qərara mən özüm də pis olmuşam. Onlar yığmanın ən intizamlı futbolçularıdı. Başqası olsa, bəlkə bu qədər üzülməzdim. Oyundan əvvəl məşqə birlikdə velosipedlə gedirdilər. Futbol emosional oyundu, lakin bəzi şeylər bağışlanmır. Komandada yaxşı ab-hava var. Bu qərar yalnız hazırkı toplanışa aiddi.

- Qələbə qazanmaq şansımız nə qədərdi?
- Buna inanıram. Futbolçular da inanırlar. Bizə qələbə lazımdı. Biz bu komanda ilə inkişaf etmək istəyirik.