''Fənərbaxça''da seçkilərin tarixinin dəyişdirilməsi gündəmdə olsa da, bu, baş vermədi.

"Football-plus.az" xəbər verir ki, əziz Yıldırım ilə Hakan Safinin mübarizə aparacağı növbədənkənar seçkilər əvvəlcədən açıqlanan tarixdə, yəni 6-7 iyunda keçiriləcək.

Bu arada Hakan Safinin ''Fənərbaxça''ya qazandırmaq istədiyi və seçkilərdə belə desək, əlində bayraq edəcəyi əsas superulduzun adı bəlli olub. Bu, ''Milan''ın vingeri Rafael Leaodu. Dünən İtaliya çempionatında ''Milan''ın ''Atalanta''ya 2:3 məğlub olduğu qarşılaşmanı ''San Siro''da tribunada izləyənlər arasında türkiyəli iş adamı da olub!

Safi həm futbolçunun, həm də ''Milan''ın rəsmiləri ilə danışıqlar aparmaq üçün İtaliyaya yollanıb. Oyun Leao üçün çox uğursuz alınıb. Hesab 0:3 olarkən - 58-ci dəqiqədə Leao əvəzlənib və həmin anda ''Milan'' fanatlarının çox böyük etirazı ilə üzləşib.

Ümumiyyətlə, İtaliya mətbuatının yazdığına inansaq, Leaonun yayda Milanı tərk edəcəyi demək olar, dəqiqdi. O, yeni mövsüm üçün ''Milan''ın planlarına daxil deyil və rəhbərlik təklifləri nəzərdən keçirməyə hazırdı. Amma ''rossonyerlər'' əsas ulduzlarından birini 60 milyon avrodan aşağı qiymətə satmaq niyyətində deyil. Ona görə də Hakan Safinin danışıqlarının nə ilə nəticələnəcəyi maraq doğurur.

2019-dan ''Milan''ın şərəfini qoruyan və klubla bir dəfə A seriyası çempionluğunu qazanan 26 yaşlı futbolçu bu mövsüm 30 rəsmi oyunda iştirak edərək aktivinə 10 qol, 3 məhsuldar ötürmə yazıb.