Əziz Yıldırımın sabiq sağ əli onun rəqibinə dəstək verdi
''Fənərbaxça''nın sabiq rəsmisi Abdulla Kiğılı qarşıdakı prezident seçkilərində Hakan Safiyə dəstək olacağını açıqlayıb.
"Football-plus.az" xatırladır ki, iyunun 6-7-də ''Fənər''də növbədənkənar prezident seçkiləri keçiriləcək. İki namizəd var və mübarizə Əziz Yıldırım ilə Hakan Safi arasında gedəcək. Kiğılı daha öncə Əziz Yıldırım dönəmində ''Fənər''də başqan vəkili kimi çalışıb və onun sağ əli olub. Buna baxmayaraq onun son dönəmlərdə Yıldırım ilə münasibətləri pozulub.
Daha öncə Əli Koçla da bir neçə dəfə görüşən, amma kluba geridönüşü baş tutmayan Kiğılı bunları deyib:
''Seçkilərdə Hakan Safinin tərəfində olacam. Çünki rəhbərlikdə artıq gənclər yer almalıdı. Biz də onları dəstəkləməliyik. Hakan Safi bu yola təkbaşına çıxıb. Heç kimdən bir qəpik də almadan yola davam edəcəyini, heç kimə ehtiyac duymadığını bildirib. Mən də sona qədər ona dəstək verəcəm. Əziz Yıldırım onsuz da 20 il prezident olub. Kifayət deyilmi? Mən özüm də vaxtilə onun yanında yer almışam. ''Fenerium'' dükanlarını mən böyütdüm və yeni səviyyəyə çatdırdım. Kluba pullar qazandırdım. Elə digər klublara da pərakəndəçiliyi mən öyrətdim. Amma artıq gənc nəsil camiədə söz sahibi olmalıdı. Mən Əziz Yıldırımdan küsməmişəm. Əli Koç ilə görüşdüyüm üçün o məndən küsüb. Mənim istədiyim insanla görüşməyə haqqım yoxdumu? Yoxsa, kiminləsə görüşməsişdən öncə mütləq Yıldırımın fikrini öyrənməliyəm?''
Digər xəbərlər
