Mahir Emrelinin yayda üçillik müqavilə bağladığı “Kayzerslautern”də məhz münasibət problemi üzündən oynamadığından xəbərdarsız.

Həmvətənimiz baş məşqçi Torsten Liberknextin ikili standartlarından şikayətlənir, çalışdırıcı isə onun məşqlərdə yetərincə fəal olmamasından. Bəli, məhz Liberknextin istəyi ilə transfer olunan Mahir bu gün heç ehtiyat oyunçular skamyasında oturmağa da layiq görülmür. Amma tezliklə belə qeyri-müəyyənliyə son qoyulacaq.

İş ondadı ki, yayda inadla Mahiri heyətində görməyi istəyən “Hannover-96” onun xidmətində maraqlıdı. Hazırda 7-ci pillədə qərarlaşan hannoverlilər də 1-ci bundesliqaya yüksəlmək uğrunda mübarizə aparır. Amma komandanın ilk 9 oyunda cəmi 15 qol vurması baş məşqçi Kristian Tisi qane etmir. İndi əsas məqam odu ki, “Hannover-96” Mahir üçün lazımi transfer məbləğini ödəmək istəyəcəkmi? Təbii ki, futbolçu ilə “Kayzerslautern” qarşılıqlı razılıqla yolları ayıra bilməsə.

Mahirin daha bir potensial müştərisi onu unuda bilməyən “Nürnberq”di. Düzdü, bu komanda 2-ci bundesliqada autsayderlər sırasındadı. Ancaq hələ də “sükan arxasında” olan Miroslav Kloze həmvətənimizin potensialından xəbərdardı, komandaya yardım edə biləcəyinə inanır. Danışıqlar üçün münbit şərait də yetişib. “Kayzerslautern” sabah məhz “Nürnberq”i qəbul edəcək. Necə deyərlər, həm ziyarət, həm ticarət!

Onu da xatırladaq ki, 2-ci bundesliqa komandaları dekabrın 21-də istirahətə yollanacaq, qış “transfer pəncərəsi” isə yanvarın 1-də açılacaq.

ORXAN