Mahir Emrelinin şərəfini qoruduğu “Kayzerslautern” 2-ci bundesliqanın 30-cu turunda da uğursuzluqla üzləşdi. “Holştayn”ın qonağı olan “qırmızı iblislər” böyükhesablı məğlubiyyətlə (0:3) üzləşdi. Məsələnin ən acınacaqlı tərəfi, təbii ki, Mahirin ardıcıl iknci oyunda adı iştirak ərizəsində yer alsa da, şans qazanmamasıdı.

Bəs, buna rəğmən gələcəyə ümidlə baxmaq olarmı? O mənada ki, “Kayzerslautern”in 1-ci bundesliqaya yüksəlmək şansı varmı?

“Football-plus.az”ın məlumatına görə, 46 xalla 7-ci sırada qərarlaşan komanda yüksək liqaya birbaşa vəsiqə qazandıran 2-ci pillədən 12 xal geridədi. Çempionatda cəmi 4 turun qaldığını nəzərə alsaq, Mahirin komandasının həmin yerə yüksəlmək ehtimalı yoxdu.

Belədə ikinci varianta baxaq. Söhbət 1-ci bundesliqada mövsümü sondan üçüncü yerdə bitirən komandaya qarşı keçiriləcək pley-off matçından gedir ki, bunun üçün “futbol ili”ni 3-cü yerdə bitirmək lazımdı. “Kayzerslautern”in heç buna da gücü çatmaya bilər. Ona görə ki, həmin sırada olan “Elversberq”lə aradakı xalı fərqi 9-du. Özü də qarşıda bu komanda ilə oyun yoxdu. Düzdü, “qırmızı iblislər” qalan görüşlərdə turnir cədvəlində qabaqladığı rəqiblərlə qarşılaşacaq. Lakin bu komandanı darmadağın edən “Nürnberq”lə “Holştayn” də məhz autsayderlər sırasında idi.

Odu ki, Mahiri 1-ci bundesliqada görmək arzumuzla vidalaşaq, onun meydana çıxması üçün dua edək. Yoxa lənət!

KƏNAN BAHADIR