Peşəkar Futbol Liqasının bu gün açıqladığı statistikadan aydın oldu ki, "Qarabağ" 2025/26 mövsümündə ev oyunlarına ən çox azarkeş gələn komanda olub.

Gözlənildiyi kimi, ikinci sırada "Neftçi", üçüncü sırada "Sumqayıt" yer alıb. Ən aşağı göstəriciyə malik komanda da təəccüb yaratmayıb. Təbii ki, bu, iki mövsümdü premyer-liqada çıxış etsə də, ev oyunlarını Bakıda keçirən "Araz-Naxçıvan"dı. "Qırmızı-ağlar" cəmi 3720 tamaşaçının tribunalarda yer almasına nail olub.

Onların daha bir itkisi var. Mövsüm ərzində komandanın xeyli matçında stadionlarda olan "Sektor-85" fanklubu fəaliyyətini dayandırıb. Düzdü, onsuz da sözügedən azarkeş qrupunun tərkibi böyük deyildi. Ancaq premyer-liqa təmsilçisinin fanklubunun olmaması ürək ağrıdır.

İndi "qırmızı-ağlar"ın müxtəlif maneələrə baxmayaraq, Naxçıvana qayıdışının zəruriliyində təkid etməyimizin səbəbi daha aydın görünür. Necə deyərlər, gözdən iraq olan könüldən də iraq olar!

KƏNAN BAHADIR