Son günlər premyer-liqada mövsümün ən önəmli hadisələri yaşanır. "Sabah" çempion olub. "Futbol ili"ni "Qarabağ"ın ikinci, "Turan Tovuz"un üçüncü sırada bitirəcəyinə heç kim şübhə ilə yanaşmır. 4-cü sıra üçün isə cəmi iki namizəd var: "Zirə", "Neftçi". Bəs "Araz-Naxçıvan", "Sumqayıt" hanı? "Qırmızı-ağlar" 6-cı, "kimyaçılar" 7-ci pillədə qərarlaşıb və mövsümü böyük ehtimala həmin yerlərdə başa vuracaqlar. Təbii ki, "Şamaxı" “boyundan yuxarı tullanmasa”.

Əslində "Sumqayıt"la bağlı suallar da çoxdu, ancaq baş məşqçi avrokuboklara vəsiqə uğrunda mübarizədə şansların tükəndiyini şəxsən etiraf etdiyindən bu barədə sonra da danışa bilərik. Hər halda, burda mənzərə daha aydındı. Lakin naxçıvanlılarla bağlı mövzulardan agah olmaq müşkülə çevrilir. Klubun prezidenti Ramin Axundovun axtarışda, qeyri-rəsmi rəhbəri Zaur Axundovun ev dustaqlığında olması haqda xəbərlər öz yerində. Sabiq baş məşqçi Elmar Baxşıyevin sirli ayrılığı, 14 turda cəmi 14 xal toplayan Andrey Demçenkonun təyinatı hələ də müzakirə mövzusudu. Hələ onu demirik ki, bu yaxınlarda klubun yeni prezidentinin Ceyhun Sultanov olacağı deyilsə də, Zaur bəyin məlum müsahibəsindən sonra bu məsələnin də sual altında olduğu ortaya çıxdı. Elə komandanın ev oyunlarını barmaqla sayılacaq qədər azarkeş önündə keçirməsi də böyük fiaskodu. Ev oyunlarını "Liv Bona Dea Arena"da, bura təmir olunanda müxtəlif stadionlarda keçirən "Araz-Naxçıvan" tamaşaçı sayına görə sonuncu sıranın daimi sakinidi. 

Bura qədər sadaladıqlarımız, təbii ki, aysberqin görünən üzüdü. Əminliklə demək mümkündü ki, özünü büruzə verən problemlər pərdəarxasında yaşananların cüzi hissəsidi. Axı od olmayan yerdən tüstü çıxmaz ki, komandanın xüsusən son oyunlarında həmin qara dumanın izləri açıq-aşkar görünür. Öz aramızdı, sanki Elmar Baxşıyev xeyir-bərəkəti özüylə aparıb. Zarafat bir yana, "qırmızı-ağlar" Demçenkonun təyinatından sonra döyüşkənlik, əzmkarlıq hisslərini unudub. Son 5 oyunda qələbəyə həsrət qalmaq vəziyyəti daha da korlayıb. Artıq naxçıvanlıları ilk "dördlük" üçün namizəd sayan yoxdu.

Ümumiyyətlə, "qırmızı-ağlar" artıq özünə bənzəmir. Komandaya baxanda nə Möminə Xatun türbəsi yada düşür, nə də Araz çayı. "Araz-Naxçıvan" deyəndə ağla Mərdəkandan başqa nəsə gəlmir. İş o həddə çatıb ki, komandanın adının "Araz-Mərdəkan" kimi dəyişdirilməsini rica edənlər belə var. Bəs, necə deyərlər, nə olacaq bu işlərin axırı? Təbii ki, hadisələrin axarı yaxşı nəsə vəd etmir. Odu ki, dəyişiklik mütləqdi, labüddü, sözün əsl mənasında, qaçılmazdı.

Komanda yeni mövsümdən Naxçıvana qayıtmalıdı. Bir neçə ildi təmir olunacağı, hətta yenidən qurulacağı iddia olunan Naxçıvan şəhər stadionunda işə dərhal start verilməlidi. Bəli, belədə "qırmızı-ağlar"ın xərcləri artacaq. Ancaq tribunalara təşrif buyuracaq minlərlə naxçıvanlıya bilet, forma və digər fanşop məhsullarının satışı hesabına bu itkini müəyyən qədər kompensasiya etmək olar. Heç şübhəsiz, ən müxtəlif səbəblərə görə digər xərclər arta bilər. Bu yerdə yenidön Zaur bəyin məlum müsahibəsi yada düşür. Sitat: "2023-cü ildə “Araz-Naxçıvan” premyer-liqaya yüksələndə mən dəstək gözləyirdim. Xüsusən də naxçıvanlı iş adamlarından. Çünki klub yarım milyona yaxın əhalisi olan Naxçıvanı təmsil edir".

Zaur bəy növbəti ifadələrində dəstəksiz qalmasının səbəbini həm də Naxçıvandan uzaqda olmalarıyla izah edir və tam haqlıdı. İş ondadı ki, funksioner həm də komandanın doğma bölgədə oynamamasının özündən asılı olmadığını bildirir. Yəni Naxçıvan şəhər stadionunun taleyi klubun əlində deyil. Yenə də bu məsələyə daha ciddi yanaşılmalı, Naxçıvan rəhbərliyi ilə əlaqələr intensivləşdirilməli, komandanın Naxçıvana qayıdışı ən qısa müddətdə təmin olunmalıdı. Axı belə danışmışdıq. İndi vədə niyə əməl olunmur? 500 min nəfərə yaxın əhalisi olan bölgə niyə futbolsuzdu, niyə yarım milyona yaxın azarkeşin gözü hələ yoldadı? Ən əsası, "Araz-Naxçıvan"la niyə bu qədər yumşaq davranılır, güzəşt edilir? 

Ümumiyyətlə, premyer-liqada daşlar yerinə oturmalıdı. "Kəpəz" Gəncəyə qayıdır. "Qarabağ" üçün "İmarət" stadionunun tikintisi başladı. Daim lağ obyekti olan "İmişli" də başına çarə qılmaqdadı. Artıq Naxçıvan cahanın olduğu kimi, "Araz-Naxçıvan" da Naxçıvanın nəqşi olmalıdı! 

KƏNAN BAHADIR