Türkiyə kubokunda final matçı keçirildi. Antalya şəhərindəki finalda ''Trabzonspor''la ''Konyaspor'' üz-üzə gəldi.

Əvvəlki mərhələlərdə ''Fənərbaxça'' ilə ''Beşiktaş''ı mübarizədən kənarlaşdırmaqla diqqət çəkən ''Konyaspor''un daha bir sürprizə gücü çatmadı. Qaradənizlilərin əsas qol silahı Paul Onuaçu bu matça da damğa vurdu. Onun 18-ci dəqiqədə vurduğu qola ikinci hissənin əvvəllərində Muleka cavab verdi. Amma 22 qolla superliqanın bombardiri olmuş Onuaçu 79-cu dəqiqədə penaltini dəqiq yerinə yetirməklə həm dublunu rəsmiləşdirdi, həm də komandasına qələbə qazandırdı. Görüşün antiqəhrəmanı isə Enis Bardi oldu. ''Konyaspor''un təcrübəli makedoniyalı üzvü 58-ci dəqiqədə hesab 1:1 olarkən penaltini boşa verdi. Onun zərbəsi dirəyə tuş gəldi.

Beləliklə, ''Trabzonspor'' bu turnirdə tarixinin yubiley - 10-cu zəfərini əldə etdi. Son iki mövsümdə finallarda uduzan ''bordo-mavililər'' sonuncu dəfə 2020-də kubokun sahibi olmuşdu. Ötən ilin martından komandanın başında olan Fatih Təkkə məşqçi karyerasının ilk titulunu qazandı. 16 ayrı komandanın qalib olduğu ölkə kubokunda rekord ''Qalatasaray''a məxsusdu. ''Cim-Bom'' bu turniri 19, ''Beşiktaş'' 11, ''Fənərbaxça'' 7 dəfə qazanıb. ''Konyaspor'' isə tarixində ikinci dəfə finalda oynadı və ilk dəfə uduzdu. Bu kollektiv 2017-dəki finalda penaltilər seriyasında ''İstanbul BŞ''dən üstün olmuşdu.

Bu nəticə ilə həm də mövsümü 5-ci pillədə bitirən ''İstanbul BŞ''nin avrokuboklara vəsiqə qazanması rəsmən təsdiqləndi. Başakşəhərlilər Konfrans Liqasında mübarizəyə ikinci təsnifat mərhələsindən başlayacaqlar.