''Qalatasaray''ın başında ardıcıl 4-cü, məşqçi karyerasının 5-ci çempionluğunu qazanmaqla hazırda Türkiyənin ən güclü çalışdırıcısı olduğunu bir daha göstərən Okan Buruk ilə bağlı tez-tez maraqlı iddialar ortaya atılır. İndi də ''Latsio'' variantı ortaya çıxıb.

Antonio Konte ilə yollarını ayırmağı planlaşdıran ''Napoli'' gözünü ''Latsio''nun çalışdırıcısı Mauritsio Sarriyə dikib. Paytaxt təmsilçisi bu üzdən indidən yeni məşqçi axtarışına başlayıb və namizədlər arasında Okan Buruk da var. Özü də ilk pillələrdə! Bu xəbəri İtaliyanın ''Tuttomercato'' saytı paylaşıb.

Mənbənin yazdığına inansaq, ''Latsio'' rəhbərliyi artıq neçə müddətdi, Okan Burukun fəaliyyətini diqqətlə təqib edir. Təcrübəli məşqçi daha öncə ''İnter''də oynayıb və italyan dilini mükəmməl bilir. Buruk özü də bir neçə dəfə İtaliyada işləməyin əleyhinə olmadığını bildirib. Xəbərdə ''Tottenhem''in De Zerbidən öncə türkiyəliyə təklif göndərdiyi, amma onun bunu geri çevirdiyi xatırladılıb.

Bundan başqa italyanların iddiasına görə 53 yaşlı məşqçi Səudiyyə Ərəbistanı nəhəngi ''Əl-İttihad''ın da ciddi maraq dairəsindədi. Okan Buruk ardıcıl 4 çempionluqdan sonra İtaliyaya yollansa, ''Qalatasaray'' camiəsi əsil dejavü yaşayacaq. Çünki Fatih Terim də 1996-2000-ci illərdəki ardıcıl 4 çempionluqdan sonra İtaliyaya yollanaraq ''Fiorentina''nın başına keçmişdi. ''Fənərbaxça'' isə dərhal bundan yararlanaraq 2000/01-də çempion olmuş və ''Qalatasaray''ın hegemonluğuna son qoymuşdu.

Tarixin təkrarlanıb-təkrarlanmayacağını zaman göstərəcək.