''Qalatasaray''ın başında 4-cü mövsümünü keçirən və bu müddətdə mühüm nəticələr əldə edən Okan Buruka xarici klubların marağı davam edir.

"Football-plus.az" xəbər vrrir ki, birdən-birə 3 klub bu məşqçini yaxından təqib edir.

''Tuttomercatoweb''in yaydığı məlumata görə söhbət ''Tottenhem'', ''Latsio'' və ''Əl-İttihad''dan gedir. Avropa Liqasının son qalibi statusunda olan, amma bu mövsüm olduqca bərbad çıxış edən ''Tottenhem'' yeni mövsümdə həm heyətdə, həm də oyun fəlsəfəsində ciddi dəyişikliyə getməyi planlaşdırır. London klubu bu radikal dəyişiklikləri Okan Buruk ilə həyata keçirmək istəyir.

Ən çox canfəşanlıq eden isə ''Latsio''du. Romalılar Burukun İtalyan dilində danışmasını və İtaliya futbolunu yaxından tanımasını nəzərə alaraq onunla bağlı uzunmüddətli planlar qurublar.

Səudiyyə Ərəbistanında son çempion statusunda olmasına rəğmən zəif mövsüm keçirən ''Əl-İttihad'' da türkiyəli məşqçi ilə hər şeyə yenidən başlamağa hazırdı.

Okan Burukun ''Qalatasaray''la müqaviləsi bu yay başa çatacaq. Ötən ilin sonlarında ''sarı-qırmızılar''ın bu məşqçi ilə müqaviləni yenilədikləri barədə bir çox xəbərlər yayılmışdı. Amma bu xəbərlər təsdiqini tapmadı. Rəsmi mənbələrdə Okan Burukun müqaviləsinin iyunun 30-da başa çatacağı qeyd olunub.

53 yaşlı mütəxəssisin əfsanəvi Fatih Terimin yolu ilə gedib-getməyəcəyi böyük maraq doğurur. Terim 1996-2000-ci illərdə ''Qalatasaray''ı ardıcıl 4 dəfə çempion etdikdən sonra İtaliyaya yollanmış və ''Fiorentina''nın başına keçmişdi. Onun İtaliya macərası qısa və uğursuz alınmışdı. Okan Buruk da ''Qalatasaray''ın başında ardıcıl 4-cü çempionluğa doğru şığıyır...