''Qalatasaray''ın 33-cü turda doğma ''Rams Park''da ''Antalyaspor''u 4:2 məğlub etməsi ilə Türkiyə çempionatında çempionluq intriqası başa çatdı.

İstanbul nəhəngi Okan Burukun başçılığı altında ardıcıl 4-cü çempionluğunu qazanaraq Türkiyə futbolunda növbəti dəfə hegemonluğunu ortaya qoydu. Buruk isə Fatih Terimin açdığı cığırla irəliləməkdə və adını tarixə yazdırmaqda davam edir.

Türkiyə çempionatı tarixində ardıcıl 4 çempionluğu yalnız bu iki mütəxəssis qazana bilib. Daha öncə ''İstanbul BŞ'' ni də zəfərə daşıyan Buruk məşqçi kimi 5-ci çempionluğunu qazandı və bu göstəricidə Ahmet Suat Özyacını (4) geridə qoyaraq ikinci pilləyə yüksəldi. Lider isə ''Qalatasaray''la 8 dəfə ölkənin ən güclüsü olmuş Terimdi. Yəni ''sarı-qırmızılar''ın tarixindəki 26 çempionluqdan 12-si Terim ilə Burukun aktivindədi. 52 yaşlı Buruk bir göstəricidə isə hamıdan bir baş öndədi və rekordu bir qədər də yaxşılaşdırdı. Söhbət həm futbolçu, həm də məşqçi kimi qazanılan çempionluqlardan gedir. O, ümumilikdə 12-ci çempionluğunu qazandı.

Okan Buruk Avropanın 10 ən güclü çempionatında Xosep Qvardioladan sonra həm oyunçu, həm də məşqçi kimi ardıcıl 4 çempionluq qazanmış cəmi ikinci futbol adamına çevrildi!

Və nəhayət, onu da bildirək ki, Okan Buruk Türkiyə çempionatı tarixində bir klubun (Qalatasaray) başında ən yüksək (80) qələbə faizi və hər oyuna orta hesabla ən yüksək (2,5) xal qazanan məşqçi statusundadı.