Mauro İkardinin ''Qalatasaray''dakı gələcəyi ilə bağlı yeni xəbər var.

İstanbul nəhənginin son 3 ildəki çempionluqlarından ikisində mühüm rol oynayan, fanatların sevimlisi olan, amma son dönəmlərdə bir qədər Viktor Osimhenin kölgəsində qalan argentinalı forvardın müqavilə müddəti mövsümün sonunda başa çatır.

Tanınmış futbolçunun meneceri bir müddət öncə verdiyi açıqlamada aşkar şəkildə ''Qalatasaray''dan yeni müqavilə gözlədiklərini bildirmiş, əks təqdirdə dekabrdan etibarən başqa klublarla danışıqlara başlayacaqlarını vurğulamışdı.

''Skay Sports''un Almaniya şöbəsinin yaydığı məlumata görə ''Qalatasaray'' rəhbərliyi İkardi ilə yola davam etməklə bağlı qərar qəbul edib. Rəhbərlik 32 yaşlı futbolçunun meneceri ilə ən qısa müddətdə danışıqlara başlamaq niyyətindədi.

Xəbərdə qeyd olunub ki, ''Qalatasaray'' İkardinin menecerinin başqa klubla danışıqlar aparmasına və ya başqa klubla ilkin anlaşma əldə etməsinə imkan verməyəcək. 2022-ci ildən ''sarı-qırmızılar''ın şərəfini qoruyan İkardi 72 qolla klub tarixinin ən məhsuldar əcnəbi futbolçusu olan Georgi Hacinin göstəricisindən cəmi 5 top geridədi.

İkardi indiyə qədər Türkiyə karyerasında 102 rəsmi oyunda 67 qol, 22 məhsuldar ötürmə ilə fərqlənib və 5 titul qazanıb.