''Qalatasaray''ın təcrübəli futbolçusu Lukas Torreyra hücuma məruz qalıb. Hadisə mayın 12-də axşam saatlarında baş verib.

Uruqvaylı ulduz Beyoğludakı bir alış-veriş mərkəzində yerləşən kafenin önündən keçərkən bir nəfərlə aralarında mübahisə yaşanıb. Həmin şəxs Torreyranın sifətinə bir neçə yumruq zərbəsi endirib. Hadisə yerinə polislər çağırılıb. Tam adı hələ açıqlanmayan həmin şəxs taksiyə əyləşərək hadisə yerindən uzaqlaşmağa çalışarkən polislər tərəfindən yaxalanıb.

Müayinə üçün xəstəxanaya getməli olan tanınmış futbolçunun sol gözünün üst hissəsindən xəsarət aldığı müəyyənləşib. Həmin şəxs qəsdən sağlamlığa xəsarət yetirmək maddəsi ilə məsuliyyətə cəlb olunub. Araşdırma zamanı məlum olub ki, Y. Y. adlı şəxs daha öncə də bu maddə ilə bir neçə dəfə məsuliyyətə cəlb olunubmuş.

Torreyra polis şöbəsinə gedərək bu şəxsdən şikayətçi olub.

Bundan başqa hadisə zamanı Torreyranın sürücüsünün də tərəfləri ayırmaq istəyərkən həmin şəxsə yumruq atdığı məlum olub.