''Mançester Siti''nin əsas qol silahı Erlinq Holannın adı qeyri-adi bir xəbərdə hallanır. Norveçli hücumçunun başına gələni bir tərəfdən gülməli, digər tərəfdən ağlamalı hadisə adlandırmaq olar.

''Football-plus.az'' xəbər verir ki, ''Siti''nin maskotu kimi çalışan xanım Holannı ona xəsarət yetirməkdə günahlandırıb!

''Hadisə'' ötən ilin oktyabrında, premyer-liqanın 9-cu turu çərçivəsində keçirilən ''Mançester Siti'' - ''Sauthempton'' oyunundan (1:0) öncə baş verib. ''Şəhərlilər''in maskotu ''moonbeam'' adlı yadplanetlidi. ''Sauthempton''la oyundan öncə stadionda çalışan və maskotu əyninə keçirən xanım polisə bildirib ki, Holann onu zarafatca başından vursa da, həmin zərbə çox sarsıdıcı alınıb.

İngiltərə mətbuatının xəbərinə görə xanım həmişəki kimi oyundan öncə uşaqlarla şəkil çəkdirərkən birdən başının arxa hissəsinə iki zərbənin dəydiyini hiss edib. Şoka düşən xanım bir müddət sonra meydanın kənarını tərk edib. O, maskotu üzərindən çıxardıqdan sonra həmkarından nə baş verdiyini və zərbənin kim tərəfindən vurulduğunu soruşub. Həmkarı isə ''bu, Holann idi. O, arxadan səni vurdu'' cavabını verib.

Xəsarət alan xanım bir müddət sonra ürəkbulanması və baş ağrısı hiss etməyə başlayıb. Ertəsi gün o, klubun tibbi personalı tərəfindən müayinə olunub və baş həkim adı açıqlanmayan bu xanıma xəstəxanaya müraciət etməyi məsləhət görüb.

Maraqlıdı ki, Holann polis bölməsinə gedərək hadisə ilə bağlı ifadə verməli olub. Amma kiçik bir araşdırma zamanı hər şey üzə çıxıb. Məlum olub ki, xanımın baş zədəsinin və baş ağrılarının səbəbi heç də Holann deyilmiş.

Polisin araşdırma ilə bağlı açıqlamasında qeyd olunur ki, Holann həmişə maskota öz sevgisini göstərmək məqsədi ilə yanından keçərkən onun belini, ya da başını tumarlayır. Hadisə yerindəki kamera görüntüləri də bu faktı təsdiqləyir. Holann həmin gün klubun talismanına sadəcə yüngülvari toxunubmuş.