Bu yay həyata keçirdiyi transfer siyasətinə görə onsuz da tənqid olunan ''Beşiktaş'' dünən şok olayla sarsılıb.

"Football-plus.az" xəbər verir ki, komandanın gənc müdafiəçisi Əmrəcan Uzunhan naməlum şəxslər tərəfindən döyülüb! Hadisə dünən Bakırköydə baş verib. Yanacaqdoldurma məntəqəsi yaxınlığında zəncirvari qəza baş verib. Həmin qəzanın iştirakçılarından biri də Əmrəcan olub. Daha sonra bu futbolçu digər sürücülər kimi maşınından düşərək polislərin gəlməsini gözləməyə başlayıb. Bu sırada F. B. adlı şəxs Əmrəcanın üstünə hücum çəkərək və onu belindən tutaraq yerə yıxıb. Eləcə də bir neçə dəfə təpiklə zərbə endirib. Hücum edənlərin bir, yoxsa bir neçə nəfər olması barədə dəqiq xəbər yoxdu. Xəstəxanaya çatdırılan futbolçunun ayağının arxa əzələsində 4-cü dərəcəli yırtıq aşkarlanıb. Əməliyyata ehtiyac duyan Uzunhanın 4-6 aylığa sıradan çıxdığı güman edilir. Hadisəni törədən şəxs artıq həbs olunub. O, təhqir, adam döymək və qəsdən sağlamlığa xəsarət yetirmək maddələri ilə günahlandırılır. Bir çox klublar və bəzi futbolçular Əmrəcan və ''Beşiktaş'' üçün ''keçmiş olsun'' mesajı yayınlayıblar. 22 yaşlı mərkəz müdafiəçisi ''Beşiktaş''a ötən yay 2 milyon avro qarşılığında ''İstanbulspor''dan gəlmişdi. Əmrəcan ötən mövsümün böyük hissəsini zədə üzündən boşa verərək cəmi 6 rəsmi oyuna çıxa bilmişdi.

ƏLİ