“Beşiktaş” camiəsi gənc müdafiəçi Əmrəcan Uzunhanın başına gələn olaydan sarsılıb.

"Football-plus.az" xəbər verir ki, hadisə şənbə günü günorta saatlarında baş verib. 22 yaşlı futbolçu İstanbulun Bakırköy rayonunda öz maşını ilə hərəkət edərkən yanacaqdoldurma məntəqəsinin yaxınlığında zəncirvari qəzaya düşüb. Əmrəcan digər sürücülər kimi maşınından düşərək polislərin gəlməsini gözləyib. Bu an qəfildən onun üstünə bir nəfər hücum çəkib və ikili əlbəyaxa olub. Deyilənə görə, adı açıqlanmayan həmin şəxs Əmrəcanın maşınına arxadan çırpılan maşının sürücüsü imiş. Hadisə yerindəki təhlükəsizlik kamerasındakı görüntülər də artıq Türkiyənin internet portallarında və sosial şəbəkələrdə yayılıb. Ətrafdakıların araya girməsi ilə onları ayırmaq mümkün olub. Əmrəcan dava zamanı yerə yıxılarkən ayağının arxa əzələsindən ciddi xəsarət alıb. Əzələsində 4-cü dərəcəli yırtıq aşkarlanan futbolçu dünən əməliyyat olunub. “Beşiktaş”ın üzvünün dediyinə görə, hücum edən şəxsin əlində kəsici alət də var imiş. Həmin şəxs polislər tərəfindən yaxalanıb. Türkiyə mətbuatının yazdığına inansaq, o, əvvəllər dəfələrlə müxtəlif cinayətlərə görə həbs olunub. Bu dəfə isə həmin şəxs təhqir, adam döymək və qəsdən sağlamlığa xəsarət yetirmək maddələri ilə məhkəmə qarşısına çıxacaq. Bu hadisənin ən pis tərəfi odu ki, Əmrəcan Uzunhan ən azı 3-4 aylığa sıradan çıxıb. Gənc mərkəz müdafiəçisi “Beşiktaş”a ötən yay 2 milyon avro qarşılığında “İstanbulspor”dan gəlmişdi. Ötən mövsüm uzun müddət zədədən əziyyət çəkən Əmrəcan yalnız 6 rəsmi oyuna çıxmış və 1 məhsuldar ötürmə ilə fərqlənmişdi.

“Beşiktaş”dan söz düşmüşkən, daha bir önəmli xəbəri də diqqətinizə çatdıraq. İstanbul nəhənginin idman direktoru Ceyhun Kazancı istefa verib. Düzdü, klubdan hələ ki, bu məsələ ilə bağlı heç bir rəsmi açıqlama gəlməyib. Amma “TRT Spor”un xəbərinə görə, Kazancı istefa ərizəsini başqan Ahmet Nur Çəbiyə təqdim edib. Ümumiyyətlə, 44 yaşlı Kazancı ilə baş məşqçi Şenol Günəşin münasibətlərinin yaxşı olmaması barədə xəbərlər uzun müddət idi Türkiyə mətbuatında dolaşırdı. Bu yay bilindiyi kimi, komanda transfer dönəmini o qədər də uğurlu keçirmir. Həmlələrin gec olması üzündən Xəlil Dərvişoğlu “Qalatasaray”a, Duşan Tadiç “Fənərbaxça”ya qismət oldu. Kamerunlu Jan Onana ilə qanalı Daniel Amarti bugünlərdə heyətə cəlb olunsa da, fanatlar bu transferlərdən razı qalmayıb. Onsuz da heyətdə afrikalı futbolçu kifayət qədərdi. Onların arasına daha 2 oyunçu cəlb olunub. Yanvarda isə Afrika Millətlər Kuboku keçiriləcək. Yəni “Beşiktaş” təxminən 1 ay 6-7 futbolçunun xidmətindən yararlana bilməyəcək. Komanda iyulun 9-dan 21-nə qədər Almaniyada toplanış keçmiş və Günəşin tələbi ilə Kazancı komandanın düşərgəsində yer almayaraq İstanbulda qalmalı olmuşdu. Bugünlərdə isə məlum olub ki, təcrübəli mütəxəssis rəhbərliyə Kazancı ilə işləmək istəmədiyini bildirib. Bundan xəbər tutan klub rəsmisi isə istefa verib. Transfer məsələsində onların arasında ciddi fikir ayrılığı mövcud idi. 2021-ci ildə “Beşiktaş”da baş katib kimi çalışmağa başlayan Kazancı 2022-ci ilin yanvarından etibarən idman direktoru vəzifəsini icra edirdi.