İsrail futbolunda böyük bir qalmaqal qopub. Bu qalmaqalın səbəbkarı norveçli Ronni Deyladı.

"Football-plus.az" xəbər verir ki, daha öncə ''Seltik'' ilə iki dəfə ölkə çempionluğunu qazanmış, eləcə də ''Nyu York Siti'', ''Standard'', ''Brügge'', ''Atlanta Yunayted''i çalışdırmış 50 yaşlı mütəxəssis bu ilin yanvarından Təl-Əviv ''Makkabi''sinin baş məşqçisi təyin olunub. O, bir xanım taksi sürücüsünə qarşı nalayiq hərəkətlər etməkdə günahlandırılır.

Hadisə ötən həftə mayın 1-də səhər saat 4 radələrində baş verib. Xanım sürücünün sözlərinə görə içkili vəziyyətdə olan Ronni Deyla maşına əyləşən kimi nalayiq və belə desək, ikibaşlı ifadələr işlətməyə başlayıb. Xanım sürücü bu durumdan xoşlanmadığını bildirsə də, məşqçi buna əhəmiyyət verməyib. Sonda isə o, pul əvəzinə sürücüyə cinsi yaxınlıq təklif edib! Xanım sürücü qorxudan əvvəlcə bir iş yoldaşına, sonra da polislərə hadisə barədə məlumat verib.

Maraqlıdı ki, məşqçi sonda heç bir ödəniş etmədən maşını tərk edib. Onun polislərə cavabı isə belə olub: ''Hədsiz dərəcədə içkili olduğum üçün heç nə yadımda deyil''. Qalmaqal bütün ölkədə ildırım sürəti ilə yayıldıqdan sonra Ronni Deyla rəsmi bəyanatla üzrxahlıq etmək məcburiyyətində qalıb: ''Bu hadisəyə görə üzr istəyirəm. Bütün detalları xatırlamıram. Çünki spirtli içkinin təsiri altında idim. Sözlərim xanım sürücüyə pis təsir edibsə, ondan, klubumuzdan və fanatlarımızdan üzr istəyirəm. Belə davranış tərzi özüm üçün müəyyənləşdirdiyim standartlara uyğun gəlmir. Bütün məsuliyyəti üzərimə götürürəm''.

Cəmi 3-4 aydı, bu klubda işləməsinə baxmayaraq bu, Ronni Deylanın İsraildə yaşadığı ilk qalmaqal deyil. Bundan bir ay öncə Təl-Əvivdə yerləşən Berlin barında da qalmaqal qopmuşdu. Həmin vaxt barmen məşqçinin normadan artıq içdiyini görərək ona daha bir içki verməkdən imtina etmişdi. Bundan qəzəblənən məşqçi barmen ilə əlbəyaxa olmuşdu. O zaman da məsələyə polislər qarışmalı olmuşdu. Son hadisə ilə bağlı araşdırma davam edir.

Deylanın üzrxahlığına baxmayaraq onun bu vəzifədə çox qalacağı gözlənilmir. Klubun nüfuzuna ziyan vurduğuna görə ''Makkabi''nin qalmaqallı məşqçi ilə ən qısa müddətdə müqaviləni pozacağı güman edilir.