Türkiyə yığmasının sabiq çalışdırıcısı Ştefan Kuntsla bağlı maraqlı və qalmaqallı xəbər yayılıb.

"Football-plus.az" xəbər verir ki, 2021-23-cü illərdə “ay-ulduzlular”ı çalışdırmış 63 yaşlı futbol adamı 2024-cü ilin mayından bəri “Hamburq”un idman direktoru vəzifəsini icra edirdi. “Dinozavrlar” həmin vaxt ikinci bundesliqada çıxış edirdilər. Kuntsun uğurlu transfer siyasəti nəticəsində komanda ötən mövsüm 7 illik həsrətə son qoyaraq, nəhayət, elitaya qayıtdı. İlk baxışdan Kunts işinin öhdəsindən çox yaxşı gəlirdi. Hətta Almaniya mətbuatında rəhbərliyin onunla müqaviləni yeniləmək istəyi barədə xəbərlər də yayılmışdı. Ancaq dekabrın son günlərində Kuntsun sürpriz şəkildə “Hamburq”dan ayrıldığı məlum oldu. Onun artıq bu klubla bütün əlaqələri kəsilib. Kunts istefasını ailəvi səbəblərlə əsaslandırmağa çalışıb. Amma reallıq başqa imiş.

Bəs səbəb nədi? Hər şey dekabrın əvvəllərində klubun xanım işçilərindən birinin idarə heyətinə şikayət ərizəsi ilə üz tutmasından sonra başladı. Həmin xanım tanınmış futbol adamını ona qarşı cinsi xarakterli ifadələr işlətməkdə günahlandırdı! Təbii ki, bu, çox ciddi bir məsələ olduğundan, idarə heyəti detalları araşdırmağa başladı. Bunun üçün müstəqil bir hüquq şirkəti ilə anlaşma əldə edildi və məsələ belə desək, həmin şirkətə tapşırıldı. Şirkət həmin xanımla görüşərək bir çox məqama aydınlıq gətirdi. Xanımın sözlərindən belə aydın oldu ki, tək o yox, klubun başqa xanım işçisi də Kuntsun sözlərindən və hərəkətlərindən ciddi əziyyət çəkirmiş.

“Bild” nəşri bugünlərdə bu qalmaqalla bağlı geniş bir xəbər paylaşıb. Hər iki xanım bildirib ki, futbol adamı həm mesajlarla, həm də üzbəüz olarkən müxtəlif sözlər işlətməklə onlara cinsi əlaqədə olmağı təklif edibmiş!

Araşdırmanın gedişində adı ictimaiyyətə açıqlanmayan daha üç xanımın Kuntsdan eyni olaylara görə şikayətçi olduğu üzə çıxıb. Müstəqil şirkətin araşdırmasından sonra Kuntsun bu xanımlara qarşı etdiyi bütün hərəkətlər üzə çıxıb. Bu üzdən “Hamburq” rəhbərliyi onunla işbirliyinə son qoymaq qərarına gəlib. 1995/96-da futbolçu kimi “Beşiktaş”da top qovmuş Ştefan Sabin adlı xanımla ailəlidi və onların iki övladı var.