Çempion Qurban Qurbanovla titulu litvalı Valdas Dambrauskasa təhvil verən Qurban Qurbanov artıq tam fərqli adamlardı. İndi onun açıqlamalarını oxumaq da çox maraqlıdı. “Sabah”dan nə az, nə çox – 13 xal geri qalmaq, inanmıram ki, Qurban bəyin və “Qarabağ” azarkeşlərinin ürəyincə ola. Hoca dünən “Turan Tovuz”u məğlub etməklə 2-ci yeri əldən verməyəcəyini göstərdi və oyunsonrası mətbuat konfransında “Konfrans Liqasında oynamağımızı arzulayırsız?”, - deyə yüngülcə jurnalistlərə irad tutdu. Ya da ən azı mən bu replikanı belə anladım. Amma diqqətimi çəkən həmin replika yox, bax, Juninyo ilə bağlı suala verdiyi bu cavab idi: “İnanmıram ki, onun bura gəlmək şans olsun. Çünki çox yaxşı çempionatda onayır. Meksika liqası pullu çempionatdı. Gəlsə, “yox” demərəm. İnanmıram ki, belə bir hal olsun. Az qol vurur, amma vacib qollar vurur. Bir az çətin görünən məsələdi”.
Əziz hoca, dəyərli hoca, mövsümü “Sabah”dan 13 xal geridə başa vuracaqsan (bugünkü mənzərə belədi…), “bayquşlar” komandandan açıq-aşkar üstün, hətta deyərdim ki, parlaq oyun sərgiləyir, bu nə xatirələrlə yaşamaq mərəzidi? Ümumiyyətlə, sabiq oyunçuların xidmətinə dəfələrlə müraciət etmək sizin klubda ifratçılıq həddinə çatmayıbmı? Axı klubu yeni səviyyəyə qaldırmaq, “Qarabağ”ın yeni obrazını indidən cızmaq, sayı hardasa 10-a çatan bütün yararsız oyunçuları göndərmək və heyətə “yeni qan” qatmaq lazımdı. Axı “Sabah” getdikcə güclənir, “Neftçi” 90 illiyində çempion olmaq istəyir, “Turan Tovuz”, bildiyimə görə, daha da iddialı olacaq. Elə isə bu nə Juninyobazlıqdı, mən ölüm?
Juninyo, bilirsiz, futbolçu kimi nə vaxt bitdi, Qurban bəy? 2025-ci ilin yanvarında! Dünənə qədər İspaniyanın 4-cü gücü sayılan “Sevilya”nın təklifini geri çevirib, isti qucaq, yuva axtaranda, pul dalınca qaçanda, “Flamenqo”nu seçəndə. Bir futbolçu harda “artıra”, daha yüksək səviyyəyə qalxa bilər? Təbii ki, güclü liqalarda və güclü klublarda oynayanda! Bu gün dünya futbolunun qəlbi “böyük beşlik” ölkələrində, özəlliklə də La Liqada atmırmı? Atır! Deməli, Juninyo da “Real”a, “Barselona”ya, “Atletiko”ya qarşı oynamaqla səviyyəsini artıra, futbolçu potensialını bütün dünyaya göstərə, daxili məmnunluq duya, dolayısıyla “Qarabağ”ı ən yaxşı şəkildə tanıda, reklam edə bilərdi. “Qarabağ” onu Avropaya tanıtdı, onun da “Qarabağ”ı bundan daha artıq dərəcədə tanıtmaq şansı var idi. Var idi…
Vətənində - “Flamenqo”da yarıtmadı, ayağını altına milyonlar sərən kluba zərrəcə fayda vermədi. İndi də Meksikaya köçüb, guya “Pumas”a gün ağlayacaq. Bir qol vurub deyə, matah olub… Boş verin, sən Allah. Mənə elə gəlir ki, yeni “Qarabağ” qurulacaqsa, onun təməl daşları bu komandanın əski futbolçuları olmamalıdı. Müasir “Qarabağ”ın memarı, Azərbaycan futbolunu müstəqillik dönəmində zibillikdən zirvəyə daşıyan Qurban bəy bu məqamın fərqinə varmalıdı!
ORXAN