Misli premyer-liqasınıın 30-cu turunda “Qarabağ” evdə “Turan Tovuz”a qalib gəldi - 2:1.

“Football-plus.az” ağdamlıların baş məşqçisi Qurban Qurbanovun oyunsonrası mətbuat konfransından hesabatı təqdim edir.

- Futbolçularımı təbrik edirəm. Yorğun qrafikdə oyunlarımız keçir. Bu qələbə vacib idi. Daha vacib olan sona kimi dözmək idi. Xarakter göstərdilər. Hər iki komandanın azarkeşlərinə təşəkkür edirəm.

- Musanın zədəsi nə dərəcə ciddidi?
- Vaxt lazım olacaq. Məşqdə bu zədəni hiss etmişdi. Dünənki məşqdə sanki normal idi. Sabah müayinə olacaq. Azca xroniki zədə idi.

- Buraxdığınız qolda qapıçının səhvi var idi, yoxsa rəqibin ustalığı əsas oldu?
- Hər ikisi. Baxımlı zərbə endirdi, amma qapıçı da reaksiya verməliydi. Daha rahat oynamaq istədi.

- Sanki zərbəyə hazır deyildi.
- Sanki ciddiyə almadı.

- Ramil bu il cəmi 9 dəqiqə şans qazanmışdı. Bu gün meydana çıxması məşqdə daha yaxşı performansına görədi, yoxsa alternativiniz qalmadı deyə?
- Ramil elə oyunçudu ki, işgüzarlığı ilə seçilib. Məşqlərdə problemi yoxdu. Ən yaxşılardandı. Bu gün oyun elə alındı ki, şans verdik.

- İntizam Komitəsi kubokun cərimələrini, sizcə, niyə açıqlamır?
- Nə bilim, bilmirəm. İndi dediz, fikir verdik. Bir də gələn il kubok olacaq (gülür).

- Yayda Juninyonun qayıtmaq ehtimalı var?
- İnanmıram ki, onun gəlmək şansı olsun. Çox yaxşı çempionatda oynayır. Amma gəlsə, “yox” demərəm. Son oyunlarda da yaxşı oynayır. Az vursa da, vacib qollar vurur.

- Yayda ən vacib mövqe sizin üçün hansı olacaq?
- İnanın, ümumi baxırıq. Oyunçu sayına və keyfiyyətinə ehtiyacımız var. Çalışacağıq ki, sayı və keyfiyyəti artıraq. Bu mövsüm çempionat düşündüyümdən daha keyfiyyətli oldu. Daha gərgin oldu. Hər xətdə yeniliyə ehtiyacımız var. Zədəsi, cəzası var - düşünmədiyin hallar olur. Yorulan futbolçular var idi bu gün. Futbolçuların son aylarda rahat olmağa vaxtı yox idi. “Sabah”la üç, “Neftçi” ilə iki oyun, “Turan Tovuz”la oyun.

- “Sabah”ın kuboku qazanmasını istəyirsiz, yoxsa “Zirə”nin?
- Hər iki komandaya uğurlar arzulayıram. Mənə cavabsız sual verdin (gülür).

- Sizcə, Konfrans Liqasında yarımfinal ehtimalınız ola bilər?
- Bizə Konfrans Liqası arzulayırsan? (gülür). Daha yuxarılarda olmaq istəyirik. Böyük futbolu hiss etmək üçün böyük turnirlər daha vacibdi. Avropa Liqasında “Bayer-04” kimi ÇL komandaları da olur. Amma bunu da unutmayaq ki, AL-də ötən mövsüm cəmi 1 qələbə qazandıq, ÇL-də 10 xal qazanmışıq. O heyətlə ÇL-ə düşməyə layiq idik. Zaqrebdəki oyunda hesab başqa olmalıydı. O oyuna qədər mən də arxayın idim ki, qrupa düşəcəyik. Bu zəmanət vermir ki, KL-də şansımız çoxdu. Ölkədən kənarda tam fərqli stress, futboldu. Hər komandanın böyük potensialı, məqsədi var. Xeyirlisi hansıdısa, o da olsun. Nə olacaqsa, gələcəkdə görərik.

MÜZƏFFƏR QULUZADƏ