Beynəlxalq İdman Araşdırmalar Mərkəzi (CIES) Azərbaycan premyer-liqasında çıxış edən komandaların baş məşqçilərinin cari mövsüm üçün orta yaş həddini açıqlayıb.

Hazırda çempionatda bu göstərici 42,2-yə bərabərdi. Ən yaşlı “Qarabağ”ın baş məşqçisi Qurban Qurbanov (49 yaş 343 gün), ən gənc isə “Sabah”ın çalışdırıcısı Murad Musayevdi (38 yaş 132 gün).

Bunu nəzərə alaraq "köhlən atlar"ın baş məşqçisi Qurban Qurbanovla söhbətləşdik.

- Hələ 50 yaşı tamam olmayan Qurban Qurbanov premyer-liqanın ən yaşlı mütəxəssisidi. Bu narahat edən, yoxsa sevindirici məqamdı?

- Bu, daha çox məsuliyyəti artırır. İşimizə daha səylə, daha ciddi yanaşmalıyıq. Bu məqam məni nə narahat edir, nə də sevindirir.

- Artıq premyer-liqada çalışan digər məşqçilər, elə sabiq mütəxəssislər də Qurban Qurbanovu ağsaqqal kimi görür, örnək göstərir. Bununla bağlı nə deyə bilərsiz?

- Hər kim ki belə görür, sağ olsun. Əvvəlcə də dediyim kimi, bu yanaşma məsuliyyətimizi artırır.

- Uzun illərdi "Qarabağ"da çalışaraq uğurlar qazanmısız və buna davam edirsiz. Gənc Qurban Qurbanovla indiki arasında hansı fərqlər var?

- İndi daha çox təcrübə toplamışam. Şükürlər olsun, uğurlarımız olub. Amma bununla kifayətlənmirik. Hər gün, hər an yeni nələrsə öyrənməyə çalışırıq. Yerimizdə durmaq istəmirik. Daim öyrənməyə ehtiyac var.

- Məşqçilik karyeranıza başladığınız illərə qayıda bilsəydiz, özünüzə hansı məsləhətləri verərdiz?

- Bu suala cavab vermək çətindi. Hər anın öz hökmü var. Bilirəm ki, həmin illərə qayıtmaq mümkün deyil. Buna görə də bu suala cavab vermək istəmirəm. Daha çox irəlini düşünmək, daha böyük uğurlar üçün durmadan çalışmaq lazımdı.

GÜNAY VƏLİYEVA