Misli premyer-liqasının 13-cü turunda “Qarabağ” “Karvan-Yevlax”a qalib gəldi - 2:0.

Oyunsonrası mətbuat konfransında Qurban Qurbanov jurnalistlərin suallarını cavablayıb.

⁃ Füzulini təbrik edirəm. Uğurlar arzu edirəm. Futbolçularımı da təbrik edirəm. Vacib 3 xal qazandıq. Asan oyun olmadı.

⁃ Sanki indi ikinci heyətiniz əvvəlki mövsümlərə nisbətdə daha zəifdi.
⁃ Ola bilər. Bizim üçün heç də asan deyil. Səfərdən gələndə səviyyəmiz 30-40 faiz aşağı düşür. Neçə futbolçumuz idman formasından uzaqdı. Ramil, Musa, Montiel, Bədavi üçün əsas heyətdə oynamaq asan deyil. Risklərə getmək istəmirik. Belə anlarda məğlub olmağa hazırıq, nəinki futbolçuları itirməyə. Əsas futbolçular yorğun olsa da, oyun ritmindən düşmürlər. Bunlar bizim üçün problemdi. Mövsümün sonuna doğru zədələrin sayı artır. 21 gündə 7 oyunumuz olacaq. Heç də asan deyil. Digər komandalar da başqa cür oynayır. Çempionat fərqli gedir.

⁃ İcraiyyə Komitəsinin iclasında yenə də olmadız. Necə olur ki, hər dəfə siz olmayanda keçirilir iclas?
⁃ Əvvəldən bildirilir ki, nə vaxt olacaq. Hamı iş başında olan insanlardı. Normal prosesdi. 3-cü dəfədi belə olur. Qərarların hamısı əvvəldən göndərilir. Burda ciddi problem görmürəm.

⁃ Yankoviçlə Mateusun münaqişəsinə görə onları tənbeh etmisiz?
⁃ Futbol emosional oyundu. Hər halda emosiolarını qorumalıdılar. Fikirlərimi bildirmişəm. Bu mövzuya ciddi diqqət ayırmışıq.

⁃ Cəza olub?
⁃ Belə də (gülür).

⁃ Koxalskiyə görə “Qarabağ”a rəsmi təklif olub?
⁃ Rəsmi təklif yoxdu. Tələsmək lazımdı. İndi inkişaf etməyə başlayırsa, özü də bunu başa düşür. Tələsmək lazımdı. Lazım olsa, danışıqlar gedəcək.

MÜZƏFFƏR QULUZADƏ