Dörd gün aralığına planlaşdırılan iki Azərbaycan derbisindən birinin nəticəsi bəllidi. “Qarabağ” səfərdə “Neftçi” darmadağın etdi – 5:1. Aprelin 30-da ölkənin ən titullu iki komandası yenə eyni stadionda, amma bir saat gec üz-üzə gələcək. Avrokuboklara vəsiqə inadından əl çəkməyən “Neftçi” qarşıdakı oyunda nə etməlidi ki, azarkeşlərini bu qədər üzməsin?

Vitali Vernidub komandadaxili problemlər olduğunu gizlədə bilmədi. Bəlkə problem çoxdan var idi, sadəcə, Vitali atası qədər peşəkar olmadığı, media önündə necə manevr etmək lazım olduğunu bilmədiyi üçün sətiraltı da olsa, vəziyyəti izah etdi.
“Neftçi” futbolçuları fərdi şəkildə ukraynalı gənc məşqçinin dediyi qədər də “Qarabağ”dan keyfiyyət baxımdan geri qalmır. Sistem də oturub. Yəni heç kim 5:1 hesabını gözləmirdi.

“Neftçi”nin oyun üslubu ilə bağlı ən böyük səhv pressinqə hədsiz həvəs göstərmək idi. “Neftçi” “Qəbələ”yə, “Araz-Naxçıvan”a qarşı necə oynadısa, eyni üslubu “Qarabağ”la oyunda da sərgilədi. Heç Avropadakı hər komanda “köhlən atlar”a qarşı bu planla çıxmağa sürət etmirdi. “Neftçi” etdi, cəzasını da artıqlamasıyla aldı. İlk dəyişməli olan gediş budu. Geridən, rəqibi özünə çəkib sürətli hücumlar qurmaq lazımdı.

Bir də “ağ-qaralar” indiki “Qarabağ”la açıq futbol oynamağın fəlakətə səbəb ola biləcəyini anlamadılar. Falaye Sako yəqin bu oyunda da olmayacaq. Açığı, oynamasa, yaxşıdı. Komandanın birmənalı şəkildə ən keyfiyyətsiz futbolçusu odu. Müdafiə ilk oyundakı kimi sabit qalsa, yaxşıdı, amma yarımmüdafiədə dəyişikliklər vacibdi. İfenyi Metyu tək idi, çatdırmırdı. Ya Elvin Camalov, ya da Emin Mahmudov o mövqedə Metyuya kömək etməlidi. Son oyunda Emin də, Emil Səfərov da hücumameyilli oyun nümayiş etdirirdi.

Bassala Sambu hazırdısa, oynaya bilər. Nə qədər də hücumçusuz oyun taktikası özünü ən yaxşı tərəfdən göstərsə də, bu “Qarabağ”dı. Kevin Medina və Bədavi Hüseynov kimi təcrübəlilərin yer aldığı müdafiə xəttini yarmaq asan məsələ deyil.
“Neftçi” bu oyunda 3 xal qazansa, 4-cü pilləyə yüksələcək. Bakılılara ən azı bir xal lazımdı. Hər kəsin gözlədiyi iki oyundan bakılılar bir xal belə qazanmasa, bu, futbolçulara da psixoloji cəhətdən təsir edəcək, azarkeşlərin də təzyiqi birəbeş artacaq.

MÜZƏFFƏR QULUZADƏ