“Qarabağ”la oyunsonrası mətbuat konfransında “Neftçi”nin məşqçisi Vitali Vernidubun bəzi futbolçulardan narazılığı hiss olundu. Əvvəlcə onun dediklərinə nəzər salaq: “Bu səviyyəyə çatmaq asan məsələ deyil. Hər gün məşq etmək lazımdı. Bunları oyunçularımızı başa düşüb, riayət etməyə başlasalar... Hər bir oyunçu ambisiyasını "Neftçi"dən aşağı saxlamalıdı. Çünki hər şeydən əvvəl "Neftçi"idi. Öz xarakterini, incikliyini unutmaq lazımdı”.

“Neftçi”nin son oyununu yadımıza salaq: “Zirə” ilə qarşılaşmanın sonundakı hakim səhvindən nə qədər danışsaq da, ən az İnqilab Məmmədov qədər səhvi olan iki futbolçu da var idi: Vensan Abubakar, Falaye Sako. Abubakar rəqibin qapısı boş qala-qala, bilmir nə etsin, yekunda Tyaqo Silva ayağından topu oğurlayıb hücuma başlayır, hücumun sonunda bütün oyunu bərbad keçirən Sako topu endirir, Konate zərbə vurur və “Zirə” hesabı bərabərləşdirir.

Belə düşünürük ki, məhz “Zirə” ilə oyundan sonra bu iki futbolçunu məşqçilər korpusu haqlı şəkildə tənbeh edib. Axı ikisi də ulduz həyatı yaşayıb, həm də yaxın dostdular. Ona görə də qərar veriblər ki, “onsuz da mövsümün sonunda gedirik, nəyimizə lazım belə fədakarlıq…”

Çox real variantdı. Baxın, mövsümün ən vacib qarşılaşmalarının birində - “Qarabağ”la oyunda bu iki legionerdən birinin də adı nəinki start heyətində, heç protokolda da yox idi. Klub rəsmiləri Vensanın zədələndiyini bildirir. Bəlkə də elədi, haqlarına girməyək. Amma necə oldu ki, məhz biabırçı səhv üzündən qola səbəbkar olan iki legioner birdən zədələndi, ardından Vitali Vernidub belə müəmmalı açıqlama verdi? Məşqçinin mətbuat konfransında dedikləri pazlın hissələrini tam yerinə otuzdurur.

Heç bir futbolçunu böyütmək lazım deyil. Biri iki həftə Ronaldo ilə komanda yoldaşı olub, digəri də Messi ilə forma dəyişib. Yəni nə Ronaldodular, nə Messi.

Yuri Vernidub və köməkçiləri belə qərar veribsə, tam doğru edib. Belə önəmli anlarda kobud səhv edən futbolçu “Neftçi” formasını daşımağa layiq deyil. Bura Səudiyyə Ərəbistanı deyil ki, puldan ötrü gələsən. Ölkənin ən köklü klubunda oynayan istənilən futbolçu bunun ağırlığını dərk etməlidi.

MÜZƏFFƏR QULUZADƏ